شنبه ۷ اسفند ۱۳۹۵ | 2017 Saturday 25 February        |         آسا = آذربایجان سر ایران

متن خبر :

ساتیرا

اؤیرنجی گونو

ایراندا آذرین 16-سی اؤیرنجی گونودور؛ 4 آی 1332-جی ایلین کودتاسیندان سونرا آمریکا رئیس جمهورونون یاردیمچیسی "ریچارد نیکسون"-ون ایران-ا سفری اوچون تهران یونیوئرسیته‌سینده اعتراض‌لار باش وئردی.

اؤیرنجی گونو
آذر ۲۱
۰۹:۲۱ ۱۳۹۵

او اعتراضلاردا اؤلدورولن اوچ اؤیرنجی‌، ایران اؤیرنجی حرکاتی‌نین سیمگه‌سی اولدولار و او گون ایراندا اؤیرنجی گونو سئچیلدی. هر ایل بو گونو آغیرلاماق اوچون یونیوئرسیته‌لر طرفیندن مراسیم‌لر قورولور، اؤنجه‌لر کیمی بو سئری ده دؤلت آداملاری و دلواپس‌لر ایشه دوشوبلر.

ایراندا هر گونون بیر رسمی وار، بو گونون ده رسمی بئله‌دی کی رئیس‌جمهور گلیب افتخارلارینی سایار: ایش‌سیزلییی یوخا چیخارتمیشام، باهالیغین نفسینی کسمیشم، فسادین ائوینی ییخمیشام، تورم منفی اولوب و بئله-بئله سؤزلر. مخالیف‌ جریانلار دا یالان چیخارتماغا گلرلر؛ خولاصه بو گون ایراندا “بگم-بگم” گونلردن ساییلیر. هر ایل بیر قونو اوستونده داوا وار؛  بو ایلین داواسی برجام‌دی، برجام توپونو هر کس او بیرینه آتیر. بیر ایلدن آرتیقدی برجام فرجام اولوب آنجاق بیر ایل پسابرجامدا سوئیفت و FATF هر نه‌یی کورلادیلار و روحانی برجام-برجام، دییه-دییه قالدی. دلواپس‌لر برجامدان “هئج” زاد اله گتیره‌ بیلمه‌دیکلرینی هاوار چکیرلر و روحانی ده دئییر برجامدی فقط بو برجام. البته مرکزدن اوزاقلاشدیقجا بحثلر ده برجامدان اوزاقلاشیر. بیر چوخ اؤیرنجی‌یه اورمو گؤلو، آنا دیلی، ارک، فراکسیون و یونیوئرسیته‌لرده تورکجه کیلاسلاری‌نین کیفیتی برجامدان چوخ اؤنملیدی. آذرین ۱۶-سیندا کئشکه فراکسیون اویه‌لری‌نین بیری گلیب اؤیرنجی‌لره بو قونولاردا دانیشایدی.

بو ایل شهرلرین چوخوندا های-کوی اولماسین دییه مراسیم‌لر بیر بالاجا او بیری ایل‌لردن فرقلی ایدی؛ مسئول‌لارین نظرینده برجام-ا تای قونولار اؤیرنجی‌لری یورور. استندآپ کمدی، ایپ چکمه، شطرنج با مانع و سیرک اویونلاری داها فایدالی و مفرح ذاتدی. مسئول‌لار دئییرلر اؤیرنجی‌لر برجام- مرجام یئرینه باشلارینی درسلری ایله قاتیب بیلیم دونیاسینا مقاله تولید ائتسه‌لر هم اؤزلرینه و هم‌ ده اوستادلارینا خوشدو. اونلارین شعاری “هر اؤیرنجی بیر مقاله” دی.

بو شعار اساسیندا مقاله اوره‌تیمینده ایرانین سرعتی دونیادا ان هیزلی سرعت‌لردندی. ایران اؤیرنجی‌لری‌نین گلیشمه‌سیندن دیغلایان دونیا بیلیم اورقانلاری‌نین گؤزلری بو آمارلاری گؤتورمور. یالاندان دئییرلر تقلب فیلان وار؛ عزیز بیلیم دونیاسی ایراندا ۲۶۴۰ دنه یونیوئرسیته وار یانی ۲۰۰  دنه چین-دن و ۸۰۰ دنه هیندوستان-دان چوخ، یازیق انگیلیس-ین ۲۹۱ و آوارا کانادانین ۳۲۹ دنه یونیوئرسیته‌سی وار. ایرانین هر دانشگاهی اورتالاما بیر دنه مقاله‌ بیلیم دونیاسینا تقدیم ائتسه دونیادا رکورد ایرانین الینده اولار. هله اوندان علاوه معلومدو حرفه‌فن کیلاسلاریندا انرژی هسته‌‌ای-نی تاپان اؤلکه‌نین یونیوئرسیته‎لرینده بیلیم فوران ائدر. انگیلیس-ده ۸۰% وزیرلر لیسانس و ۲۰% لیسانس‌دان یوخاریدیلار. ائی یازیق انگلیس ایراندا شهر شورالارینا آدای اولماق اوچون بالا- بالا لیسانس قبول دئییل، ایران دؤلتی دوکتوراسی اولمایانلاری وزیر سهلدی چایچی دا سئچمیر.

اخبار مشابه

۰ دیدگاه

هیچ دیدگاهی نوشته نشده است.

دوست دارید دیدگاه خودتون رو به اشتراک بزارید؟

نوشتن دیدگاه

نوشتن دیدگاه

آدرس ایمیل شما منتشر نمیشود.
لطفا با دقت پر کنید. *