یکشنبه ۳۰ مهر ۱۳۹۶ | 2017 Sunday 22 October        |         آسا = آذربایجان سر ایران

متن خبر :

یازغا

اخلاقیات چؤکرسه، معنویات و انسانلیق چؤکر…

قدیم زامانلاردان سوندان گؤرموشلوک، ائل آراسیندا قینانان، خوش‌گؤرولمه‌ین و حتی مذموم صفتلردن‌ سایلیردی. هئچکیم وار دولتینی اوزه‌چکمه‌ییب، ثروتی‌ ایله حؤرمت قازانمازدی.

اخلاقیات چؤکرسه، معنویات و انسانلیق چؤکر…
آذر ۰۲
۱۱:۲۸ ۱۳۹۵

حتی هر کس اؤز مال دولتینی اولدوغوندان چوخ داها آز گؤسترمک ایسته‌ردی. آنجاق نئجه اولوبدور کی، سوندان گؤرموشلوک ائله چوخالیب، ائله یایقینلاشیب کی، آرتیق قباحتینی الدن وئریب، حتی یورغون، اومودسوز و جانسیز توپلوموموزدا یاواش یاواش بیر ده‌یره چئوریلمکده‌دیر؟!
سوندان گؤرموشلوک، چوخ آشاغی سوییه‌ و دورومدا بؤیوک وار دؤلت و ثروته زحمت چکمه‌دن یئتیشمک، و بو زحمتسیز ثروتی اؤیونوب، اؤزونو گؤستره‌رک خرجلمکدن عبارتدیر.
ساواشلار، اجتماعی ده‌ییشیم‌لر، گرگینلیکلر، و اقتصادیاتی یانلیش یؤنلتمکلر نتیجه‌سینده توپلومدا بیر طبقه یارانار کی، بو تلاطم‌لردن اؤنجه یوخسول ساییلارمیشلار، سونرالار اختلاس، احتکار، سو استفاده‌لر و باشقا اَیری یوللارلا کلان ثروتلره ال تاپیرلار و اونلارین اؤز گئچمیشلرینه اولان حقارت حیسلری اونلاری اؤز وار دولتلرینی اؤزگه‌لره نمایش ائتدیرمه‌یه قورشالاییر. حقیقتده بو تیپ انسانلارین اؤزلرینی گؤزه سوخماقلاری اونلارین، گئچمیشه قایدیش احتمالی‌نین قورخوسوندان قایناقلانماقدادیر.
بئله بیر اخلاقی- اجتماعی چؤکوش بیر چوخ اؤلکه‌ده یاشانیبدیر؛ بیر یوخسول اجتماعی قات، توپلومون عمومی یاپیسیندا بحران یارانینجا (ساواش، دئوریم و…) گرگین دورومدان یارارلانیب، یوخاری ثروتلر الده ائدیرلر، آنجاق باشقا اجتماعی- کولتورل ثروتلردن یوخسون اولدوقلاری سونوجدا تؤک- داغیدا باشلاییب، ثروتلرینی اودا چکیب، خرجلمکلرینی و اؤزلرینی گؤزه سوخماق ایسترلر.
سوندادان گؤرموشلویون بیر جامعه‌ده یایقین اولماسی، او جامعه‌ده عدالتسیزلیگین یایقین اولماسی دئمکدیر. عدالتسیزلیکده اخلاقیات خسته‌لنر. بیر جامعه‌ده اخلاقیات چؤکرسه، معنویات و انسانلیق چؤکر…

سوسن نواده رضی

اخبار مشابه

۰ دیدگاه

هیچ دیدگاهی نوشته نشده است.

دوست دارید دیدگاه خودتون رو به اشتراک بزارید؟

نوشتن دیدگاه

نوشتن دیدگاه

آدرس ایمیل شما منتشر نمیشود.
لطفا با دقت پر کنید. *