شنبه ۱ مهر ۱۳۹۶ | 2017 Saturday 23 September        |         آسا = آذربایجان سر ایران

متن خبر :

به قلم محمدرضا باغبان کریمی:

سلطان حسین بایقارانین شاعرلیک دونیاسی

آسانیوز: سلطان حسین بایقارا، اقتدارلی بیر سلطان اولاراق، 35 ایل اؤلکه‌ده حکم سورموش، بؤیوک ساواشلاردا ظفرلر قازانمیش، اؤلکه‌نی دوزه‌نه سالاراق امین– آمانلیق یاراتمیش و اؤلکه‌نین ادره‌سی ایله برابر شاعرلیک ده ائتمیشدیر و گؤزل غزل‌لری ایله دیلیمیزه خدمت گؤسترمیشدیر.

سلطان حسین بایقارانین شاعرلیک دونیاسی
آذر ۰۸
۱۷:۳۰ ۱۳۹۵

 شوبهه یوخدورکی، اونون اؤلکه‌نین آوادانلیغی اوغروندا چالیشدیغی ایله برابر، دیل و ادبیاتیمیزین گلیشمه‌سینده چابالاری دا اؤنملی و قالارغی‌دیر. اونون ایگیدلیگی، جسورلوغو و اؤلکه دولاندیرماسی بیر یانا، عاشقانه غزل‌لری ایله داها آرتیق ائل ایچینده یاشاماسینا زمینه یارادیر. بیز بورادا سلطان حسین بایقرانی بیر شاعر کیمی گؤرمک ایسته‌ییریک و شاعرانه دویغولارینی، دوشونجه‌لرینی و دیل اوغروندا باشاریلارینی اینجه‌لمک قصدینده‌ییک.
آذربایجان و تورک دونیاسیندا چوخلو حاکملر، سلطانلار و خاقانلار سیاست و ساواشلارلا برابر، بو اینجه ساحه‌لرده ده چالیشمیشلار. یاخشی بوراسی‌دیر کی بو سلطانلار، حرمسرالار دوزه‌لتمک و رقاصه‌لرله خوش کئچیرمک یئرینه، عالیم‌لر، صنعتکارلار و شاعرلرله ییغینجاقلار قوروب، ادبیات و اینجه‌صنعت اوغروندا چالیشماغی خوشلاییردیلار. هوسبازلیق یئرینه، دیل و ادبیاتین چیچکلنمه‌سی یولوندا چالیشیردیلار. ایراندا، حتا یاخشی تانینمیش سیمالار- کریم خان زند، و … کیمی شاهلارین ساراییندا مغبچه‌لر، قارینلارین هوسلری ایلک پلاندا دایانیرسا، تورک سلطانلاری  بونلارین ترسینه، شاعرلری، موسیقیچی‌لریر، نقاش، خطاط، منجم و عالیم‌لری توپلاییب، اونلارین اردم و ادبلریله خوش اولوردولار. آنجاق بو سؤز، او دئمک دئییلدیر کی، تورک سلطانلاری‌نین هامیسی بئله اولموشلار؛ ایچلرینده ظالم، قان یوران و عیاش‌لاری دا اولموشدور. بلکه بونو دئمک ایسته‌ییرم کی شاعر سلطان‌لاریمیزی باشقا سلطان و شاهلاردان آییرماق لازیمدیر. بو سلطان‌لار عشق و سئوینج ایله شعر یازاراق، خلق‌لرینه ده محبت ایله توخونوب، ادبیات و دیلیمیزه ده خدمت گؤسترمیشلر. احمد برهان الدین، سلطان بایقارا، جهانشاه حقیقی، شاه اسماعیل صفوی و باشقالاری بئله اولموشلار و اونلارین واقعی حیاتلاریندا عیاشلیق، قادین بازلیق، و باشقا چیرکین عادتلر یئرینه خلق سئوگیسی، ائل قایغیسینی گؤرمک چتین دئییلدیر. او بیری طرفدن بو شاعرلر، عشقدن دانیشان زمان، دیللری باشقا شاعرلردن فرقله‌نیر. بورادا، حتا عشق و سئوگیه ایگیدلیکله توخونورلار، گاهدان سلطانلیقلارینی سئوگی یولوندا ذلیل بیلیرلر. بیز بورادا بو دئدیکلریمیزی سلطان حسین بایقرانین دیوانیندا گؤسترمک ایسته‌ییریک.
هر سؤزدن اؤنجه، حسینی‌نین دیوانیندا بو نئچه موضوعو آراشدیرماق لازیم بیلیریک:
شاعرلیک و سلطانلیق
شعر دونیاسی
عشق دونیاسی
سؤز و دیل باخیمی

شاعر‌لیک و سلطانلیق

سلطان حسین بورادا بیر شاعر کیمی گؤز اؤنونه آلیریق. دوغروسو بودور کی، او بیر سلطان ‌دیر. بوتون سارای امکانلارینی الده ائده‌رک، عالیم‌لر ، صنعتکارلار و شاعرلر جرگه‌سینی یارادان بیر سلطان، و اؤزو ده بیر شاعر اولاراق بو امکانلاردان یارارلانان انسان‌دیر. شاعرلری تشویق ائدیب، اؤزو اوچون ده امکانلار و اردم الده ائتمه‌یه چالیشیر. او، بیر گؤرکملی عشق و سئوگی شاعری کیمی ادبیاتیمیز آلانیندا چیخیش ائدیر. حسینی، یارینی سئویر، بیر انسان کیمی بوتون پاک دویغولارینی دیله گتیریر و جالب بوراسی‌دیر کی، اونون دیوانیندا دوزگون بیر انسانلا، تمیز روحلو، پاک قلبلی، دوغرو و شرفلی انسانلا اوز اوزه گلیریک. اونون شاعرلیگی ائله‌دیر کی، هئچ زمان سلطان اولدوغونو ایتیرمه‌ییر و بیر عالی، یوکسک دورومو اولان آدام اولدوغونو یاددان چیخارماییر. آنجاق بیر شاعردیر، اوره‌یی‌نین دؤیونتولرینی سؤیلمک اوچون قلم اله آلمیشدیر، یوخسا شاعر اولمازدی. او دا، بوتون شاعرلر کیمی اوره‌ک سئوگی‌سیندن دانیشیر، سئوگی یولوندا اؤز هنر و اردمینی گؤسترمه‌یه چالیشیر. عشقدن دانیشاندا سلطانلیغینی فدا ائتمه‌دن چکینمیر، عشق قارشیندا عاجز اولدوغونو گؤسترمکله، عشقین عظمتینی نشان وئرمه‌یه چالیشیر. بونو دا آرتیریر کی، حتا اژدها دا بو یولدا عاجزلیگینه اعتراف ائتمیشدیر:
عشق دست زوری گر بودور، منیم عجزیم نه‌دن
اژدها گر بولسه اؤز عجزینه قیلار اعتراف.
شاعر ده اؤز ناتوان اولدوغونو بیلدیریر. شاعر وصل آختاریر، وصل گنجینی تاپماق اوچون، گدالیغی شاهلیقدان اوستون ساییر:
گنج وصلین کیم دیلر – مسکین حسینی، وه ایرور،
اول گدا کیم شاهلیق قیلار تمنا، ای رفیق!
سلطن حسین، چوخلو شعرلرینده، یاز کویوندا گدالیغی سلطانلیقدان افضل ساییر و بئله دئییر:
چون حسینی‌دیر گدایین، حسندن وئرگیل زکات،
ای ملاحت فخری، اول سیمین آلور، سائیل دئییل!
اؤزونو سایل سایمیر، چونکی سایل گوموش- قیزیل آلیرسا، حسینی یارین گؤزه للیگینی زکات آلیر و بو گدالیق، حقیقتده سلطانلیقدان باشدیر.
سلطان حسین، اؤلکه ‌نین و اسلامین اوغروندا قیلینج وورموش بیر سلطان‌دیر. آنجاق سلطانلیغی بئله چتین اله گتیرمیشسه ده عشق یولوندا وئرمک دیله‌ییر:
عشق تاراجیندا واردی دین و اسلامیم داغی،
دئمه‌نیز کیم بولموشم دیوانه‌ی شیدا و بس!
او، سلطنته فخر ائتمیر، یار کویونون گداسی اولماغی داها چوخ بگه‌نیر:
ای حسینی! سلطنت دن آنجاق فخریم یوخدورور
کیم دییرلر کویونون خیل گداسیندان منی.
او، سئوگی یولوندا ثابت قدم اولوب، بیر یارا اوره ک باغلایاراق، باشقاسیندا گؤز یومور:
ای که دیرسن کیم حسینی اؤزگه‌یه وئرمیش کؤنول،
اؤزگه‌یه وئرمک اوچون ای بدگمان، کؤنلوم هانی؟
بئله لیکله، حرمسرا اهلی اولمادیغینی دا بللندیریر.شاعر، عشق یولوندا اجلدن ده قورخماییر و اؤلوم دالیجا گئدیر:
ای اجل! قورخوتما اؤلدوردوم دیین، اؤلدوره‌سن،
گر دیری تاپسان فراقینین جفاسیندان منی!
بئله لیکله، سلطان حسین بایقارا، سلطانلیقدان آرتیق بیر شاعر اولماسینا گووه‌نیر و گؤزه‌ل شاعرلیک ائدیر.


محمدرضا باغبان کریمی

اخبار مشابه

۰ دیدگاه

هیچ دیدگاهی نوشته نشده است.

دوست دارید دیدگاه خودتون رو به اشتراک بزارید؟

نوشتن دیدگاه

نوشتن دیدگاه

آدرس ایمیل شما منتشر نمیشود.
لطفا با دقت پر کنید. *