جمعه ۲ تیر ۱۳۹۶ | 2017 Friday 23 June        |         آسا = آذربایجان سر ایران

متن خبر :

اوشاق ادبیاتی

قونور آیی *

«سئویل»ین اویونجاق آییسی وار ایدی، قونور رنگده ایدی. او آیینی چوخ سئوردی. اونونلا یاتاردی، دوراردی، گزمه­یه گئدردی، یئمک یئینده ­ایسه اوز­-­اوزه اوتورداردی.

قونور آیی *
آذر ۲۱
۰۹:۲۸ ۱۳۹۵

بیر گون سئویله یئنی بیر آیی آلدیلار. کؤهنه آیینی بیر بوجاغا توللاییب، یئنی‌سی­ایله اویناماغا باشلادی. گونلر کئچدی، قونور آیی بوتونلوکله اونودولدو، ائله بیر بوجاقدا آتیلیب قالدی. او چوخ داریخیر، آمما دؤزومله گؤزله‌ییردی.

بیر گون شولوق بیر اوغلان آناسی ایله بیرلیکده سئویل گیله قوناق گلدی. سئویلین اویونجاقلاری ایله اوینادی، اونلاری اورا- بورا آتدی. گئدنده ایسه قونور آیینی اؤزو ایله آپاردی. اونلارین ائوینده آیی اؤزونو چوخ یالنیز دویوردو. اوسته­لیک­ده شولوق اوغلان اونون بیر قولاغینی چکیب قوپارمیشدی. بیر گون اوغلان حیطده اویناییردی. او، شولوق اولسا­ دا، اوره­یی یوموشاق­ایدی. قونشو قیزینی اوتوراجاقدا اوتوروب داریخماغینی گؤردوکده، ائوه قاچیب، بیر قوجاق اویونجاق گؤتوروب قیزا آپاردی. قیزجیغاز اونلارین ایچینده یالنیز قونور آیینی بَیندی. قوجاغینا آلیب سیغاللادی. آمما آخشام ائوه گئدنده آناسی، قونور آیینی اؤزو ­ایله آپارماغا اجازه وئرمه­دی. آیی اوتوراجاغین بیر بوجاغیندا قالدی. قارانلیق دوشدو. گئجه اولدو. کوچه­ده هئچ کیم قالمادی. یالنیز تک قولاق قونور آیی اوتوراجاغین اوستونده اوتوروب اوزگون- اوزگون اولدوزلارا باخیردی. بیر آزدان اولدوزلار­ دا یوخ اولدولار. سحره یاخین یاغیش یاغدی. سحر تئزدن آناسینین الیندن توتموش سئویل، اوشاق باغچاسینا گئدیردی. اوتوراجاغین اوستونده بوزوشموش، قالمیش آیینی گؤردو. اونون کدرلی گؤزلرینده یاش داملالاری واردی. سئویل آیینی گؤتوروب باغرینا باسدی.

*قونور= قهوه رنگی

یازار: سید رضا حسینی  مرند

اخبار مشابه

۰ دیدگاه

هیچ دیدگاهی نوشته نشده است.

دوست دارید دیدگاه خودتون رو به اشتراک بزارید؟

نوشتن دیدگاه

نوشتن دیدگاه

آدرس ایمیل شما منتشر نمیشود.
لطفا با دقت پر کنید. *