دوشنبه ۸ خرداد ۱۳۹۶ | 2017 Monday 29 May        |         آسا = آذربایجان سر ایران

متن خبر :

هفته‌لیک فالینیز

هفته‌لیک فالینیز
آذر ۲۱
۰۹:۳۲ ۱۳۹۵

آغلارگولر (قوچ، فروردین): طالعیزده یئنی بیر ده‌ییشیک‌لیک گؤرونور، بو آنسیزین بیر مسافرت، تانیشلیق‌لار و یا ائیتیم ده اولا بیلر. هرنه دیر، سیزه چوخ خوش بیر اولای اولاجاق. امکداش‌لار و یولداش‌لار ایله زمان گئچیرمه‌یی چوخ سئویرسیز. هئچ زمان اولمادیغیز بیر زادا تظاهر ائتمه‌یین، یئرسیز سوال‌لار، نئیلیم- نئجه‌ائلییم‌لر و… دن ساخینین،  اولومسوز انرژی وئرن‌لردن اوزاق اولون. سیزین اؤزوزون یئترینجه روحی دوروموز دوشگون‌دور. دا اونو آبارتمایین. اؤزوزو سئویندیرمک اوچون الیزدن گله‌نی اسیرگه‌مه‌یین.

گولن‌آی (بوغا، اردیبهشت): یاشام طرزیز و ایش دوروموز ده‌ییشمک حالدادیر. بو استرس تؤره‌دن اولا بیلر! قورخونج حالدا داورانماق سیزین سارسیلماز شخصیتیزه هئچ ده یاراشمیر! ایش باشیندا اولانلار سیزین اؤنریلریزه داها چوخ ماراقلی گؤرونه‌جکلر. هفته‌نین ایلک گونلری اورتاق مال‌لار، ارثیه، بیمه و… ده گؤزلریزی دؤرد آچین، بو قونولاردا غفیل‌لنه بیلرسیز. بو دورومدان یارارلانماق اوچون چوخ تئز چابا گؤرستمه‌لی‌سیز. آماجلاریزی سیرالاییب، اونلارا چاتماق ایستییرسیز. بوآرادا جرو بحث، اؤز سؤزوزده زوراکیلیق ائتمک و… دن ساخینساز، هرزاد دوزه‌لر.

قیزاران آی (ائکیزلر،خرداد): یئنی تانیشلیق‌لار یاشامیزا هیجان گتیره‌جک. بلکه اَیلنجه‌لی سفرلره چیخدیز! گنل‌ده اولای‌لارین هامیسی سیزه هیجانلی و گؤزل گؤرونور. هفته‌نین ایلک گونلری تانیمادیغیز بیر کس سیزی سورپرایز ائده‌جک! نهایتده دئمه‌لییم ایلیشگی‌لرین هامیسی سیزین گلیشمه‌نیز و ایرلی‌لمه‌نیز اوچون اولمالی‌دیر و داها هئچ نه! گئچمیشدن، درس آلیب اوندا ائتدیگیمیز سهو‌لری تکرار ائتمه‌سک، عالی اولار. دیقه باشی ای وای‌ی‌ی‌ی دئمه‌یین. اومودلو اولون و ساغلاملیغیزی قورویون.

قوراپیشیرن (یئنگج، تیر): اؤز حاقلاریزی ساوونماق زوروندا قالاجاق‌سیز. بو قونودا اوغورلو دا اولاجاقسیز. بو هفته هدیه‌لر و سوغات‌لار سیزی سئویندیره‌جک. هفته‌نین ایلک گونلرینین اولوملو اولای‌لاری سیزین یاشام و ساغلاملیغیزی تماما ائتگیلندیریب، یوکسلده‌جک. آماجلاریز داها دوزگون شکل تاپماقدادیر. سیز ایلیشگی‌لره دوام ائتمکدن ده بیرآتدیم یوخاری، یعنی ائولنمه‌گی دوشونورسوز! اولا بیلر دا بیز بیر سؤز دئمیریک کی! مندن ائشیدیرسیز، کیمسه‌دن یاردیم‌لاریزی اسیرگه‌مه‌یین، بئله‌لیکله اؤزایشلریز ده اوغورلو اولار.

قویروق دوغان (آسلان، مرداد): نه‌دن بو قدر بیقرار و دؤزوم‌سوز داورانیرسیز؟ بورج‌لاردان نگرانسیز؟ نگران اولمایین، آللاه قادردیر. گئچمیشی، گئچمیشده بوراخیب، ایرلی گونلری دوشونمه‌لیسیز. گئچمیش‌دن ساده‌جه اشتباه‌لاری آزالتماقدا یارارلانماق اولا بیلر. دعا ائلیین، اولوملو دوشونون، ساغلاملیغیزی قورویون و گوجلو آتدیم‌لارلا ایرلی گئدین. ایلیشگی‌لرده بؤیوک‌لرین مصلحتینه قولاق وئرین. بو دوروم اؤتری‌دیر، آنجاق اؤزوموز بیلرکن، نییه باشقالارینی اینجیدک؟ بو هفته ایچیزده اولان گرگین‌لیک‌لره سون قویوب، عائله و اوشاقلاری آرتیق دوشونوب اونلاری سئویندیرمک ایستییه‌جکسیز.

زومار (باشاق، شهریور): ایش یئرینده گؤرستدیگیز چابا گیزلی قالمییاجاق و امکداشلار دا سیزه یاردیم ائتمک ایستییه‌جکلر. سیزده حقوق و مزایانی آرتیرماق ایستییه بیلرسیز. هفته‌نین ایلک گونلری عائله‌وی ایلیشگی‌لر ده بام- باشقا اولاجاق. والدین‌لری آرتیق دوشونمه‌لیسیز. اؤزل یاشامیزدا هر زاد خوشلوغا دوغرو گئدیر. سئوگیلیز ایله ساواشیب- تارتیشماق یئرینه، مهربان و صمیمی اولون، الیندن توتوب اونو هامیدان چوخ سئودیگیزه اعتراف ائدین. بوزو بیر قاب ایچینده اریدیب سویا دؤندرمه‌سک، الیمزدن آخیب، گئدر!

خزل (ترازی، مهر): شلوغ بیر هفته‌نین ایچینده‌سیز. اؤزللیک‌له توپلومسال ایلیشگی‌لرده. اوتوروم‌لار، گؤروشلر، اوشاقلار ایله زمان گئچیرمک و… سیزین اوچون خوش اولاجاق. یاشامی داها حیزلی حس ائدیرسیز، بوآرادا آنسیزین اوز وئرن اولای‌لار دا یاشام مسیریزی دئییشیر. بو اولای‌لار عائله عضو‌لریندن بیرینه اولسا بیله، سیزین  یاشامیزدا بیر دؤنوش نقطه‌سی اولا بیلر. یئییب- ایچمه‌ییزه فکر وئرین، ساغلاملیغیزی قورویون و احتیاط‌لی اولون. کوسولی‌لره باریشماق موشتولوغون وئریرم.

قیروو (عقرب، آبان): ائوین بو قارماشیق دورومونو دییشمک ایستییرسیز. سیز بو دورومدان اصلا راضی دییلسیز. ائوین دارماداغینلیغی دا چوخ- چوخ اولوب. ائو ایچی دعوالار سیزی یورور، نه یاخجی بو دورومو دوزلتمک ایستییرسیز. ائوین دئکوراسیونونو دئییشمک ده یاخشی فکر دیر، هامی ال- اله وئریب بیرله‌شرلر. هفته‌نین ایلک گونلری ایش مؤقعینیز و یا مالی دوروموزدا اولوملو اولای‌لار اوز وئره‌جک. بیر هدیه وار. بلکه ده بو هدیه‌نی اؤزوز- اؤزوزه وئردیز! قورخو و نفرت‌دن ساخینین راحاتسیزلیق‌لاری یئنمک اوچون اؤزوزه گوونمه‌لیسیز.

آزر(یای، آذر): چئورزده چوخ هیجانلی اولای‌لار اوز وئریر. گیزله‌دسیز- گیزلتمییه‌سیز سیزین بیر نفره اولان سئوگی دولو باخیش و داورانیش‌لاریز یوز آغاجدان سئچیلیر! هفته‌نین ایلک گونلری بیر اولای اساسیندا سیز داها چوخ اؤزگورلوک، گنج‌لیک و بشاش‌لیق حس ائده‌جک سیز. بیرآز بئل و ستون فقرات دا راحاتسیزلیق حس ائدیر سیز، چوخ آبارتمایین، سویوق‌دیمه‌دن دیر. آزاد هاوا دا اولون، یئرسیز جروبحث‌دن ساخینین، سؤزو چوخ اوزاتمایین، فقط اؤز دوروموزو اؤنمسه‌مه‌یین و ساغلاملیغیزا فکر وئرین.

چیلله (اوغلاق،دی): چالیشمالاریزین هامیسی ثمر وئره‌جک. گلیرلرین آرتیریلماسی و ایشلرین دوزلمه‌سی اؤز ایشلریزدن آسیلی‌دیر. سیز پولو بوشونا خرج‌لمک و هدر وئرمک‌دن ساخینارسیز، بو چوخ یاخشی دیر، اما اولمویا بو خصلت سیزی قیتمیرلیغا چکه ؟! ده‌ییشیک‌لیکلر اؤزل یاشامیزدا اولاجاق، آنجاق نهایتده بو اولای سیزین اؤزوزو ده چوخ ده‌ییشدیریب، هامی بونو باشا دوشه‌جک. چالیشمالارلا ایشلری اوزه سالماق اولار. دانلاقلارا فکر وئرمه‌یین. ساغلاملیغیزی قورویون و گوجلو آتدیم‌لارلا ایرلی‌له‌یین.

 دوندوران (قووا، بهمن): سیز اؤز ایشلییه‌نیز و اؤز رئیسیز اولماق ایستییرسیز. اینانج‌لاریزدا چوخ قرارلی‌سیز و اؤزوز تصمیم توتوب، اؤزوز عمل ائتمک ایستییرسیز. بونا چوخ انرژی واریزدی. آنجاق بونلارا باخمایاراق سیزین داورانیش‌لاریزین هئچ بیرینده زوراکیلیق و نزاکت‌دن اوزاق بیر حرکت گؤرونمور. هفته‌نین ایلک گونلری یولداشلاردان بیری سیزی سورپرایز ائده‌جک، اوزاقدا اولان بیر تانیش و یا اقربا‌دان بیر خبر آلاجاقسیز. بو سیزی چوخ سئویندیره‌جک. ایلیشگی‌لرده اؤز تجربه‌لریزدن یارارلانین.

بایرام (بالیقلار، اسفند): اؤزل ایلیشگی‌لر آداق- آداق گیزلین‌لیگه دوغرو گئدیر! ایچیزده باش قالدیران دویغولاردان تکجه اؤزوزون خبریز وار. هفته‌نین ایلک گونلری سیز هر یؤنلو ده‌ییشه بیلرسیز، اؤز یاشیدلاریزلا داورانیشلاریز، والدین و یا رئیسیزنن اولان داورانیشلار و… آنجاق هرزاد یاخشی اولماغا دوغرو گئدیر. سیز اؤزگورلوک و آزادلیق یولوندا چالیشیرسیز. دینجلیک ایسته‌سز چوخ دانیشماقدان ساخینین. داها هر نه اؤز یولوندادیر: پول، ساغلاملیق، ایش- گوج و…

حاضیرلایان: ر. رعنا

 

اخبار مشابه

۰ دیدگاه

هیچ دیدگاهی نوشته نشده است.

دوست دارید دیدگاه خودتون رو به اشتراک بزارید؟

نوشتن دیدگاه

نوشتن دیدگاه

آدرس ایمیل شما منتشر نمیشود.
لطفا با دقت پر کنید. *