پنجشنبه ۱۰ فروردین ۱۳۹۶ | 2017 Thursday 30 March        |         آسا = آذربایجان سر ایران

متن خبر :

گؤره‌سن ملتین غم- کدر ایچینده یاشاییب، اوزنون گولمه‌مه‌سی دولت‌ و مجلسین وئجینه‌دیرمی؟

گالوپ موسسه‌سی‌نین 138 اؤلکه‌دن، بو اولکه‌لرده سئوینج و خوشبختلیک دورومونا گؤره حاضیرلادیغی راپورا اساسن، عراق دونیانین ان اوزگون اؤلکه‌سی تانیندی. عراق‌دان سونرا، ایران، مصر، یونان و سوریه، سیرا ایله دونیانین ان اوزگون اؤلکه‌لری اولاراق تانیتدیریلدی.

گؤره‌سن ملتین غم- کدر ایچینده یاشاییب، اوزنون گولمه‌مه‌سی  دولت‌ و مجلسین وئجینه‌دیرمی؟
آذر ۲۷
۲۳:۰۳ ۱۳۹۵

گؤره‌سن اسلامی شورا مجلسی، یا دا دولت هیئتی، ایران جماعتی‌نین اوزگون اولدوغونون سببلرینی آراشدیرماق اوچون     ایندیه کیمی بیر اوتوروم قوروبدورلارمی؟
هئچ گالوپ موسسه‌سی‌نین آراشدیرماسی اولماسا بیله، ائله ایندیجه خیابانا چیخیب جماعتین اوزونده اومودسوزلوق و اوزونتونون نئجه دالغالاندیغینی گؤرمک اولار. گالوپ-ون راپور ائتدیگینی، ایران جماعتی اتی ایله، سومویو ایله، بوتون وارلیغی ایله یاشاماقدادیر.
حکومت، جماعتدن مالیات آلدیغی کیمی، مملکتین نفتینی ساتدیغی کیمی، اؤلکه‌نین بوتون اموراتینا نظارت ائتدیگی کیمی، سینیرلارین امنیتینی ساغلادیغی کیمی، اقتصاد، معیشت، سیاست، کولتور و… سایره‌نی یونه‌لتدیگی کیمی، توپلومون سئوینجلی و اومودلو یاشاماسینی ساغلاماق دا حکومتین گؤره‌ولریندن ساییلیر.
سئوینجسیز و اوزگون بیر توپلوم هر زامان، سونو بللی اولمایان اولومسوزلوقلار و یولسوزلوقلارین یاتاغی‌دیر. دؤلت‌لر یول سالدیرما، صادرات- واردات، انفلاسیون (نرخ تورم)، بورس‌لار و… گؤره راپور وئردیکلری کیمی، انسانلارین سئوینج و اومود اورانینا گؤره ده راپور وئرمه‌لی‌دیرلر، چونکی ذاتا بوتون او ایشلر انسانلارین داها یاخشی، داها راضی و داها سئوینجلی یاشاماسیندان اؤتور گؤرولور.
ایتیردیگیمیز ندیر دوغوردان؟ نیه بو قدر گوونسیزلیک وار؟ نیه انسانلار بونجا نامهربان اولوب ؟ نیه دؤزومسوزلشمیشیک؟ نیه گوذشت ائلیه‌بیلمیریک آرتیق؟ گله‌نکلریمیزده بول- بول ادب-ارکان وار ایکن، نیه هئچ او قدیم کولتوروموزدن اثر قالماییب داورانیشلاریمیزدا؟
چاره ندیر؟ یول هایان‌دیر؟ یا بو درده نه نسخه یازیلمالی‌دیر، بونو دئمک اولماز. آنجاق بو سوسیال خسته‌لیگین پاتولوژییه احتیاجی اولدوغو، آراشدیریلیب ندن‌لرینین بلله‌ندیریلمه‌سی دانیلمازدیر. سوسیال اوزمانلار، بیر سئوینجلی توپلومون ان اؤنملی اؤزللیگینی او توپولومدا اولان اومودولولوقدا، سوسیال گووه‌نجده، بیرئیسل سئوینجده (نشاط فردی) و انسانلارین جسمی ساغلاملیغیندا بیلیرلر. اونلارا گؤره، انسانلارین مختلف سیاسی، کولتورل، سوسیال چالیشمالاردا قاتیلیمی، بیرئیسل و عائله‌وی یاشام سویه‌سی‌نین آرتماسی، ایش یئرلرینده وئریملی اولا بیلمک، توپلومدا سئوینج و سعادت دویغولارینین آرتماسی اوچون ان ائتگیلی عامل‌لردن‌دیر.
ایرانین سئوینج و سعادت رتبه‌سی دنیا سویه‌سینده اولدوقجا دوشوک‌دور. سانکی بیزلر سئوینجلی اولوب، خوشبخت یاشاماق اوچون هئچواخت هئچ بیر پلانلامامیز اولماییبدیر. گولوب سئوینمک انسانین ان تمل احتیاجلاریندان‌دیر. پسیکولوگلارا گؤره، انسانین ان سئوینجلی چاغلاری گولدویو زامان‌دیر. دوغوردان بیزیم جماعت گونده نئچه ساعات گولور؟!
گؤره‌سن ملتین غم- کدر ایچینده یاشاییب، اوزنون گولمه‌مه‌سی دؤلت و مجلسین وئجینه‌دیرمی؟

اخبار مشابه

۰ دیدگاه

هیچ دیدگاهی نوشته نشده است.

دوست دارید دیدگاه خودتون رو به اشتراک بزارید؟

نوشتن دیدگاه

نوشتن دیدگاه

آدرس ایمیل شما منتشر نمیشود.
لطفا با دقت پر کنید. *