شنبه ۱ مهر ۱۳۹۶ | 2017 Saturday 23 September        |         آسا = آذربایجان سر ایران

متن خبر :

یاغیشلی بیر گونون خاطیره‌سی

حيط قاپيسيندان چيخار- چيخماز ساغاناق ياغيش ياغمايا باشلادي. ماشينا دوغرو يئيين يئريمه ‌يه باشلاديم. يئنه ده اوست قاتداكي قونشوموز آرابانين اؤنونو اؤز آراباسييلا قاپاتميشدي. آيفونا دوغرو يؤنلديم، آيفونون توشونا باسدیم.

یاغیشلی بیر گونون خاطیره‌سی
آذر ۲۷
۲۳:۱۹ ۱۳۹۵

ارگین افشار

اوتانا- اوتانا بیر داها توشا باسدیم خبر اولمادی یئنه. یاغیشدان قورونماق اوچون اؤزومو دووارین تینینه سیخیشدیرمیشدیم. چوخ زنگ ووراندان سونرا خبر اولمادی… چاره‌سیز آرابانین باگاژیندان چتریمی گؤتوروب سویو سوزولموش یولا دوشوب، آنا یولدا تاکسی گؤزله‌مه‌یه باشلادیم. یاغیشدا دا تاکسیلرین ساخلاماسی آللاها قالمیش، بعضی‌سی گؤزونو تیکیر آدامین گؤزونه و «دربست» سؤزونو ائشیتمک ایستیر، ائشیتمه‌یینجه  آداما چاتدیرماق آماجییلا دوداقلارین ترپه‌دیر و دوعالار ائله‌ییر!!! بعضی‌سی ده  دئیه‌سن باش خبری آپاریر، تک باشینا اوتورموش ساققیز چئینییه- چئینییه سایمازجاسینا یئیین اونوندن اؤتور. بعضی‌سی ده کی آللاه گؤسترمه‌سین سانکی آتاسینا  قیزیل یئرینه قزیل ساتمیشسان.  نورمال  سرعتله گلیر سنه یئتیشن کیمی گازا باسیب، آرابانین فرمانین سنه دوغرو چئویریر و قالان- قولان قورو یئرینی ده او ایسلادیر!
میللتیمیزین بو پوزوغون داورانیشلارینی اؤز ایچیمده حلاجلیق ائله‌یه- ائله‌یه تاکسی‌لری ده گؤزومدن قویموردوم. بو  اثنادا  اوزاقدان گلن بیر  تاکسی‌نین  یاواشلاتماسی اومود کؤزلرینی گؤزلریمده آلیشدیردی. یاواشلادان تاکسی یاخینلاشدیقدا سوروجونون تردودلو باخیشلاری منیم چکینگن‌لیگیمی  ایکی قات آرتیردی. سوروجونون آجیناجاقلی باخیشلاری،  ایچینده‌کی انگل‌لره غالیب گلدی، بیر آز اؤتندن سونرا گئریله‌ییب، آیاقلاریمین یانیندا ساخلادی و باشی ایله چوخ ادبله مینمه ‌مه اشاره ائله‌دی، من ده ایسلاق البسه‌لرله اوتانا- اوتانا آرخا قاپینی آچدیم، اؤنجه‌دن حاضیرلادیغیم کاغیذ مندیل‌لری صندلی‌نین اوستونه سریب، اوتوردوم.  سلام وئردیم چوخ نزاکتله جوابینی وئردی، عوذر ایسته‌دیم‌، باشینی خفیف ترپه‌ده رک انسانی بیر وظیفه اولدوغونو خاطیرلاتدی. اوره‌ییمده، هله ده انسانلیغین اؤلمه‌دیینی دوشونوردوم کی، سوروجو دئدی: یاغیشدا دوران خانیمی دا گؤتورک، یاغیش سانکی بیله‌سینی جیم- جیلیق سو ائله‌میش… من ده چکینرک: «چوخ ساغ اولون. صوابدی دا بو یاغیشدا»، دئدیم.. ماشین خانیمین آیاقلارینین اؤنونده دایاندی و قاریشیق حیسلرله آرابایا مینن گؤزل و دوزلو  خانیم بیر اوتانج و تیترک سسله تشککورلرینی بیلدیردی.! سوروجو ده چوخ ادبله «خانیم بیزیم ایشیمیز و گؤره‌ویمیزدیر» دئدی.  آرابا بیر آز گئتمه‌دن سوروجو اؤنده اوتوران خانیما: «ووردوغونوز لاک چوخ رنگی گؤزل  بیر لاکدی!» دئدی. یولچو خانیمین سانکی یئنی دونو آچیلار کیمی سایغی ایله سوروجونو آلتدان- آلتدان سوزه‌رک دئدی:
-دوغوردان؟
سوروجو:
– والله. من بئله رنگلری  چوخ سئورم.
یولچو قادین بیر ملیح سسله:
-بللی‌دیر کی چوخ ذوقولو بیریسیز- دئدی.
من ده بو قدر تئز آلیشمادان هویوخاراق، ذهنیمین درینلیکلرینه جوموب، بو قدر تئز آلیشمانین سببیلرینه بیر فلسفی چؤزوم ذهنیمده آختاریردیم کی، یئنه سوروجو بو یولچو قادیندان سوروشدو:
– دوغوردان، ساچلارینیزین دا رنگینی چوخ سئودیم، ساچینیزین دوغال رنگی‌دیر یا بویامیشسینیز؟
یولجو قادین دا چوخ ادبله  سوروجویه بیر یان گؤزله باخیب دئدی:
-خئیر، ساچیمین دوغال رنگیدی.
سوروجو ساچ سؤزونو اورتایا آتارکن من ده ساچلاریما دوشن آغ دنلری دوشوندوم و بیر آز سوره سوروجو ایله یولجو قادینین سؤزلرینه قولاق مسافری اولا بیلمه‌دیم… بیر آز سس‌سیزلیک حاکیم اولاندان سونرا
-جیلدینیز ده ماشالله چوخ دورو و شفافدیر..
یئنه من اؤز جیلدیمین هایینا قالدیم و یئنی یئتمه‌لیکده داغدا- باغدا آت چاپیب، جیلدیمه هئچ دقت ائتمه‌دییمی دوشونوردوم… اؤزو- اؤزومه دئدیم: بوراخ بابا! من آری- دورو جیلدی نئینیرم آخی…..
بو آرادا سوروجونون تیتیزلیکله یولوجو قادینی سوزمه‌سینی ده اهمال ائتمیردیم . یئنه سوروجو بیر احتراصلی سسله :
-مانتونوز  چوخ گؤزلدی، تورکیه مالیدی؟-  دئیه سوروشدو.
یولجو قادین بیر آز توموب، «بلی» دئدیینده، منیم بیر آز گوبود سسیم، او اینجه سسه غالیب گلیب، دئدیم :
-عفو ائدین، من مقصدیمه یئتیشدیم بو دا کرایه‌م.
سوروجو ده دئدی :
-قابل بیر شئی دئییل بویورون.
دئدیم:
-چوخ لوطف ائله‌دیز بو یاغیشدا ساغ اولون.
پولو اؤده‌دیم و تاکسیدن ائندیم. اداره حیطینی ساییلی آتدیملارلا اؤلچرکن تاکسی‌ده اولوب- بیتن دانیشیقلاری دوشونورکن اؤز- اؤزومه دئدیم: دوغوردان بو خانیملارین دونیاسی نه صاف و صداقتلی بیر دنیادی! نه تئز آلیشدیلار  و بیر اسکی دوست کیمی  درد-ی- دیله باشلادیلار…
قادین سوروجونون ده بو یاغیشدا منی گؤتورمه‌سی اونون ایچ صافلیغینین وتمیزلیگینین نشانه‌سی ایدی… بلی سوروجو بئله دیرلی بیر قادین ایدی…

اخبار مشابه

۰ دیدگاه

هیچ دیدگاهی نوشته نشده است.

دوست دارید دیدگاه خودتون رو به اشتراک بزارید؟

نوشتن دیدگاه

نوشتن دیدگاه

آدرس ایمیل شما منتشر نمیشود.
لطفا با دقت پر کنید. *