اوشاقلێق گۆنلری…

⭕️اوشاقلێق گۆنلری..
✍یازان: #نوروز_احمدزاده – کرج

اوشاقلێغین کۆسۆب، باریشما کۆچه‌لری‌نین دؤنۆم دؤنگه‌لرینده ایتیرمیشم اؤزۆمۆ…

اوشاقلارلا بؤلۆشۆرۆک اوْیناماغا. هرکس اؤز هالایێن چکیر. یئنه منیم اۆستومده عیباد ایله زینال دالاشێر!
جێریق یاماقلێ پالتارلار! کؤهنه و ائشیڲه آتێلمیش تای دَڲیشیک باشماق‌لار! جورابسیز آیاق‌لار! صمیمی ایسته‌مه‌لی اۆرک‌لر.

ال اله دۆڲمه دَله
بیز گئدیریک بابام گیله
بابام منه، بیزه باشماق آلا
بیر تای سنه، بیر تای منه
دوْنبالان پیس…

داشدان دۆزلمیش سَکی‌لر، سۇواخلی در – دیوار، اوجا تاقچالار، قێرخ پیلله‌لی کهریزلر، سَرین و ایچمه‌لی سولار، رنگ‌به‌رنگ ختمی گۆل‌لر. بؤیۆک بیر توت آغاجێ حیطدن بوْیلانیب، کۆچه‌یه باخماسی! کؤهنه آرابا، قوْجا آت و.. یوْرغون آرابا و جوان سۆرۆجۆ! وفالی آغ کؤپک، قێشین اوزون گئجه‌سی، شَبچره‌سیز چیلله! جَرجَنک قالمێش کۆرسۆ! شۆشه‌سی سێنیق دوره پیلته‌لی چێراق! نفتی چیراق! بایرام سُفره‌سی،
کۆرسۆنۆن اوْدسوز – کؤمۆرسۆز قابێ! نئچه دانا رنگلی شیرنی، سَمنی، بیر دانا اوْن شاهی‌لیق پنابات! کیچیک پرتقال سفره‌نین اوْرتاسیندا…

خان‌ننه اوشاقلارێ چاغیریر: «دورون گلین! سیزه، مَلک جمشید و جێرتدانین ناغیلین تعریفلییم. اوْ سوْیوق و دوْنموش ال‌لریزی منیم قوْینومدا قێزدیرین، کۆچه چوْخ شاختادی.»

بو یوْرغون و خسته جانێم دوْلودور عشق، محبت ایله… ایسته‌ییرم قارتال کیمی قاناد چالێب، اوجالێقلاردا یوْخ اوْلوب، گؤزدن ایتَم…

۱۴۰۲/۱۱/۱۳ – گئجه ساعت بیر

@MuncuqAz
https://t.me/Sancaq_media/6382