ایهان و باهار فصلی

⭕️آیهان و باهار فصلی

✍چئویرن: #سوسن_نواده‌رضی

📸عکسی سالان: تبریزلی اۆلکر

بیر گۆن وار ایدی، بیر گۆن یوْخ ایدی. باهار فصلی تازا باشلامیشدی. کندین اوجا تپه‌سینده گؤی- گؤیرنتی‌لر بیتیب، رنگ – رنگ گۆل‌لر آچمیشدی. کپنک‌لر قوْزالارێندان چێخبب، گۆل‌لرین اۆزَ‌رینده اۇچوشوب، اوْیناقلایارکن باهارین گلیشینی هر کسه بیلدیریردیلر.

آیهان‌گیلین ائوی تپه‌نین اۆستونده ایدی.

آیهان باهارین گلمه‌سینه چوْخ سئوینیردی. اوْ، گئدیب چؤلده، چمن‌لر اۆستونه آتێلیب – دۆشوب، اوْیناماق ایستیردی، آنجاق ائلیه بیلمیردی. آخێ اوْ ناخوْشلامیشدی.

نئچه گۆن گئچدی. آما آیهان‌ێن ناخوْشلوغو جۆرلنمه‌دی. اوْ ائشیڲه چێخا بیلمیردی. کَردی‌ده‌کی گۆل‌لر، آغاج باشێندا یووا قوران قۇش‌لار، حۇض‌داکی بالێق‌لار چوْخ دارێخیردیلار آیهان اۆچون، آخێ آیهان اوْنلاری چوْخ سئوردی، دیندیرردی، اوْنلارلا دانێشاردی…

آیهان گۆل‌لره سو وئرردی، قوش‌لارا دَن سپَـردی، بالێق‌لارا ماهنێ اوْخویاردێ…

خلاصه کی، بۆتۆن گئچن ایل بوْیونجا آیهان اوْنلارا یئتیشیب، اوْنلارلا اوْینامیشدی و بیله‌لرینه چوْخ خوْش گئچمیشدی.

نئچه گۆن گئچندن سوْنرا، گۆل‌لر دئدیلر:

– نیه بس آیهان گلیب، بیزیمله اوْینامێر؟!

قۇش‌لار دئدیلر:

– نیه بس آیهان گتیریب، دَن سَپمیر بیزه؟!

بالێق‌لار دئدیلر:

– نیه بس آیهان گلیب، بیزه ماهنێ اوْخومور؟!

هامێسی یێغیشیب، کپنَـڲی چاغێردیلار، دئدیلر:

– اۇچ گئت پنجره‌دن گیر آیهان‌گیله، آیهان‌دان بیزه بیر خبر گتیر.

کـپنک تئز قاناد چالێب، گئتدی. آز سوْنرا قایێدێب، دئدی:

– آیهان ناخوْشلایێب، سوْیوق دَڲیب بیله‌سینه. آما آناسێ اوْنا ایسپَناق – گشنیش آشی پیشیرمیشدی، یئدیردیردی. دیییردی بو آشدان ایچسن، ایکی گۆنه توْختایێب، گئده بیلرسن اوْیناماغێ‌نین دالێسیجا!

ایکی گۆن گئچدی. آیهان یاخشێ استراحت ائیله‌میشدی، آناسێ پیشیرن آشدان دا بوْل – بوْل ایچمیشدی، هم توْختامێشدی، هم ده حسابی گۆجلنمیشدی. ساپ- ساغلام قاچدێ ائشیڲه، گۆل‌لره، قۇش‌لارا و بالێق‌لارا اوجادان سلام وئردی. سوْنرا دا اوْنلارلا بیرلیکده بهار ماهنێسینی اوْخویوب، اوْینایێب، شنلیک ائتدیلر.

@MuncuqAz

https://t.me/Sancaq_media/6375