بؤیۆک بیر غفلت!!

یازان: نورالدین مقدم (آیدین دومان) 🔶کتاب سرگیسینده تۆرک عایله‌لرین چوْخو فرقینده اوْلمادان غرفه‌میزده تۆرکجه کتابلار اعلانینی گؤره‌رک، کئچیب گئدیرلر. ماراقلانمادان، سؤال سوْروشمادان، شکیل چکمه‌دن! البته هامی بئله دڲیل، دانیشدیران، تشکّر ائدن، کتاب آلان، نظر وئرنلر ده اوْلور. آنجاق فیکرلَشیرم تهرانین یاریسی تۆرک اوْلماسین، اۆچدن بیری تۆرک اوْلماسین، اوْندان بیری تۆرک اوْلسون! سرگییه گلنلرین، غرفه‌میزین قاباغیندان کئچنلرین، ۵۰.دن بیری غرفه‌یه دؤنۆب باخا و اوشاقلارینا دئیه کی، بو غرفه‌نین کتابلاری تۆرکی‌دیر، منی راضی ائدر. 🔶هردن فارس عایله‌لر ایسه غرفه‌میزی گؤرۆب، دۇروب، «همه‌اش ترکی‌یه! خیلی جالبه! چه باحال! چقد عالی! اوّلین باره می‌بینم کتابای ترکی رو و … خیلی قشنگه!» بو کیمی سؤزلرله نظرلرینی ابراز ائدیرلر. چوْخلاری شکیل ده چکیر. حتی تۆرک قوْنشولارینا کتاب آلیر پای اۆچون…. 🔶اوشاقلارا گلدیکده من چوْخ اۇمودلویام. اوْنلار بیزدن داها چوْخ منطقلی فیکرلشیرلر. بیر نئچه دؤنه پستلاردا بونا من تأکید ائله‌میشم. بیر نمونه ده ایندی گتیریرم. بیر یارێ‌یاشلی کیشی، بیر قادین، بیر اوشاق؛ قادین گؤرۆر تۆرکجه کتابلاری، دایانیر، اوشاغا گؤرسه‌دیر. اوشاق هوسله‌نیر، ایسته‌ییر، کیشی‌یه دئییرلر. کیشی: – «اه من خودم نمیتونم بخونم، برای بچه بگیرم؟!» البته تۆرکدۆر و لهجه‌سیندن بللی! دئییرم: «آنجاق اوشاقلار اوْخویانماسالار دا ایستیرلر و اوْخویا دا بیلرلر، اوْنلارین دۆشونجه‌لری یئنی‌دیر و بیلیرلر دانیشیلان دیل، اوْخونولا دا بیلر.» سؤزۆمۆ قورتاماغا قوْیمادی! اوشاغی چکیب، غرفه‌نین قاباغیندان آپاردی. و حِییفلندیم بیزیم چوْخوموز نه بؤیۆک غفلتده‌ییک. 🔶بیر آز سوْنرا مدرسه اوشاقلاری گلمیشدی. بیر نئچه‌سی بیزیم غرفه‌یه باخیب، ماراقلاندیلار. کتابلارا باخاراق داها ماراقلاری چوْخالدی. بیری تۆرکجه‌نین آموزشی کتابینی ایسته‌دی. وئردیم، بَـڲندی و آلاراق بیریسی بلکه معلّملری ایدی، سوْروشدو: – «کتاب ترکی میخری؟» اوشاق دئدی: – «آره، هرچی به بابام میگم بهم یاد نمیده، میگه حوصله ندارم، تصمیم گرفتم خودم یاد بگیرم.» 🔷یاشاسین اوشاقلاریمیز.