تبریز تجارت تاریخینین سرگیسیندن گزارش
حاضرلایان: #گۆنش_امانی بیرینجی تبریز تجارت تاریخنین روایت سرگیسی، فرهنگ و ارشاد اسلامی ادارهسینین استاد یاسمی سالوْنوندا باشلاندێ. بو سرگی آذربایجانێن استاندار و همراه هئیتی، شهر شوراسێندان اوْلان حاج آقا زعفرانچێ، تبریزین بیر چوْخ تاجر، کوْلکسیونر و چوْخلو تعداد تاریخ و تجارت ساحهسی ایله ماراقلانانلارێن حضورو ایله شنبه گۆنو، گۆلن آیێنین ۲۲.سینده، آخشام ساعت دؤرد ده […]
حاضرلایان: #گۆنش_امانی
بیرینجی تبریز تجارت تاریخنین روایت سرگیسی، فرهنگ و ارشاد اسلامی ادارهسینین استاد یاسمی سالوْنوندا باشلاندێ. بو سرگی آذربایجانێن استاندار و همراه هئیتی، شهر شوراسێندان اوْلان حاج آقا زعفرانچێ، تبریزین بیر چوْخ تاجر، کوْلکسیونر و چوْخلو تعداد تاریخ و تجارت ساحهسی ایله ماراقلانانلارێن حضورو ایله شنبه گۆنو، گۆلن آیێنین ۲۲.سینده، آخشام ساعت دؤرد ده باشلاندێ و چهارشنبه آیێن ۲۶.سینا کیمی دوامی اوْلاجاق.
🔸بو نمایشگاه تبریزین آدلێم مجموعهدارلارێندان اوْلان امین همتی (ایران سکه تاریخینین ان بؤیۆک مجوعهداری و مؤلف)، رضا سرابی اقدم (مجموعهدار و پئشهلر موزهسینین بانیسی)، احد پورطلایی (تاریخی نسنهلر مجموعهداری)، فرشاد فائزیپور (اسکناس و اسناد مجموعهداری)، سیدرضا سیدشریفی (چاپ مجموعهداری) فریبا اسحقی (آنێت و نسنهلر مرمتچیسی و زینتی سۆسلمه و تاریخی نسنهلر توْپلایان)، داریوش رحمنزاده (تاریخی نسنهلر مجوعهداری)، کریم میمنت نژاد (تاریخی سندلری آراشدیران و مجموعهداری) و حامد حامدی خسروشاهی (تاریخی سندلری آراشدیران و مجموعهداری)نین همتی ایله قورولوب و گؤرۆشو دؤرد گۆن مدتینده سحر ساعت ۱۱ دن ۱۴ و آخشام ساعت ۱۶ دان ۲۰ کیمی عموم اۆچون آزاددێر.
🔸بو سرگینین حاشیهسینده عؤمرۆنو آذربایجان و تبریزین تاریخی، اونودولموش پئشهلری و سندلرینی قوْرویوب، ساخلاماقدا صرف ائیلیین و یوْرولمادان- اوسانمادان بو ساحهده دایانێب- دیرهنن حؤرمتلی «رضا سرابی اقدم» جنابلارێیلا اوْلان مختصر آچێقلامانێ سیز عزیز اوْخوجولارێمزا سونورام.
🔹آقای رضا سرابی اقدم، بئلنچی بیر سرگینین قورولما آماجێنی بئله آچئقلادێرلار:
🔸«تبریز، ایپک یوْلوندا واقع اوْلدوغو اۆچون، بوردا بیزیم زندیه زمانی، صفوی زمانی و قاجار زمانی چوْخلو تاجرلریمیز وارایدی. تبریز بازارێ، قاجار زمانێندان دۆنیانێن ان بؤیۆک اۆستو اؤرتۆلو بازارێ عنواندا ثبت جهانی اوْلوبدور و بو تاریخه دایاناراق تبریزده تاجر چوْخ ایدی. بو تاجرلرین ترابزون، استانبول، باکی، تفلیس و کلکته کیمی یئرلرده چوْخ شعبهلری وارایدی و بولار آل- وئر ائلییب، نامه یازێب و تجارت ائلردیلر. او تاجرلر، تجارت سربرگلرینده نامهلرینی یازاردێلار. بیز اوْنلارێن تجارت کاغاذلارێنی یێغمیشیق. بو کاغاذلار یێغیشیب و تاریخ تجارت تبریزدن بؤیۆک بیر مجموعه اوْلونوب. بوندان علاوه بیزیم بوردا اوْلان «برات»لاردان آد آپارماق اوْلار. او زمان چک و دسته چک یوْخایدی، فرض بویورون «حاج رسول صدقیانی»نین هم بوردا شعبهسی وارایدی، هم استانبولدا. بوردان ایستییر استانبولدا بیر نفره پول وئرسین بوردا برات یازاردی.
او طرف براتی آپارێب استانبولدا پول آلا بیلردی، وسایل آلێب گؤندره بیلردی. براتلار بو اۆزدن چوْخ مهم ایدی. سندلر و براتلاردان سوْنرا بیزیم بوردا «سکه» سرگیمیز ده وار. آقای «امین همتی» سکه مجموعهداری تبریز و ایراندا دارالسلطنهٔ تبریز آدێنا ضرب اوْلونان اولین سکهلرین مولاژلارێنی بوردا نمایشه قوْیوبلار. خانم فریبا اسحقینین ده تاریخی مجموعهسیندن گؤزل مولاژلار نمایشه قوْیولوبدی. بو نمایشگاه دؤرد گۆن واردی. جماعت گلیب گؤرۆب، تبریزین تجارت تاریخیندن فایدالانیب بیزیم تاریخی سندلریمی مطالعه ائلییب، گئچمیشده اوْلان تاجرلریمیز و اوْلارێن ائتدیکلری تجارتلردن بیلگیلنه بیلرلر.»
@SancaqDergisi
https://t.me/Sancaq_media/6336
