قارغێش

قارغێش یازان: #ویدا_حشمتی

– آخی نه‌دن کیمسه اوْرا گئتمیر؟ نییه اوْرا مسافر آپارمیرسیز؟… بونلاری دئییرکن، گنج اوْغلانی قانع ائتمَڲه چالیشیردیم. اوْ، اۆزونو منه

چئویریب، سوْیوق باخیش ایله جواب وئردی:

لبت بیر شئی وار کی، هئچ کس اوْرا گئتمیر!.. قرار دڲیل هر شئیه دیله گلک کی!… واز کئچ خانیم، واز کئچ!

منیم اومودلاریم یئنی تۇمورجوقلانمیشدی. نییه واز کئچه‌یدیم؟.. ایللردیر بو گۆنون حسرتینی چکمیشدیم. بئینیمده خیاللار بسله‌میشدیم. ایڲیرمی ایل گؤزله‌میشدیم بو گۆنو

– آغا! سن نئچه ایسترسن من وئره‌جم. دئییرسن ایکی – اۆچ قاتێنی وئریم. ایسترسن دوْلار وئره‌رم.

پاسپورتومون آراسیندان دوْلارلاری چێخارتدیم، اوْنا سارێ توتدوم. گنج اوْغلان باشینی آشاغا سالیب، باشماقلارینا باخار کیمی دۆشونجه‌یه دالدێ. بیردن محکم و قرارلی بیر لحن‌له دئدی:

کئچ اوْتور!..

سئوینجدن دئدیم:

سن آللّه؟ دۆز دئییرسن؟…

– کئچ اَڲلش! آخیرده، منی اۆزدن آپاردین

فلاسکدان باشقا، هر نه الیمده واریدی، آرخا صندلین اۆستونه قوْیدوم. اؤزۆم ده قاباقدا اوْتوردوم. ایستیردیم هر طرفه دقتله باخام. سسسیزلیک ایچینده، ماشینی سۆرن اوْغلانین قوْلونداکی دؤیمه‌یه، گؤزۆم دۆشدو. اۆزو اوْلمایان بیر قیزین شکلی ایدی! آلتیندا دا لاتینجه دنیز یازمیشدی. بیر سؤز سوْروشماق ایسته‌دیم. سوْنرا اؤزۆمه دئدیم، حتماً سئودیڲی بیریدی. ایندی ماراقلانماق زامانی دڲیل.

پاییزین سوْیوغو جانیمی اۆشوتدو. جامی اۆسته چکدیم. یوْل قیراغینداکی کوْللار، کۆلَڲین موسیقی‌سی ایله اوْیناییردیلار. سانکی کؤکلریندن قوْپوب، اؤزلرینی یئلین الینه وئرمک ایسته‌ییردیلر. کوْللارا ایلیشن نایلوْنلار، یاپیشقان کیمی یاپیشیب، سئویلمه‌ین بیر گؤرۆنتۆ یاراتمیشدیلار. بو گؤرۆنتۆ منی چاشدیریردی. اۇزون زامان ایدی دوْغانین تر – تمیز گؤرۆنمه‌ڲینه آلیشمیشدیم. اوْرالاردا دوْغانین چوْخ اؤنمی واردیر. هر کس بیر گؤرَولی کیمی دوْغادان مُغایات اوْلار. اۆزومو چئویریب، گنج اوْغلانا سارێ دؤندۆم.

کؤیکسۆمۆ اؤتۆرۆب، دئدیم:

ایتیک چوْخ پیس اوْلار! آدامین گؤزۆ دایما آرخاسێندا اوْلار‌..

بارداغی چای‌لا دوْلدوردوم. اوْغلان ایستکسیزجه بارداغی آلدی. آغزێنی بیچاق آچمیردی. ظنّ ائدیردیم کی، «نه ایتیڲی؟» سوْروشاجاق. من ده دانیشماغا باشلایاجاغام. آما داشدان سس چیخدی، اوْندان سس چیخمادی. دۆز باشی‌نین اۆستونده بیر شکیل واریدی. ایکی کیشی ماوی بیر مینی‌بوسون اؤنۆنده دورموشدولار. بو شکیل ماشینین گۆنلۆڲۆنه (سایه‌بانینا)

یاپیشدیریلمیشدی. عمی جانین ماوی مینی‌بوسو یادیما دۆشدو. اوْ زامانلار اوْنا قاپدێ – قاچدێ دئیردیک. هر ایل یایدا بۆتون عائله ماوی قاپدێ – قاچدێیا دوْلوب، اوْرا گئدردیک. اوْخویاردیق، اوْینایاردیق. دئییب – گۆلمک دیزدن اوْلاردی. بیر دَببه سو، بیر بؤیۆک خیار گؤتۆرۆب، ساحیله گئدردیک. هردن بیر تۇیوپ کرایه ائدیب، دالێمیز اۆسته اوزاناردیق. گۆنشین جێزلاماسی بیر یاندان، گؤلۆن شوْر سویو بیر یاندان… اۆزوموز یانێب، آجێشاردی. قابیق قوْیاردیق. قاپ‌ قارا اوْلاردیق.

وْ گۆن ساحیلده عمی‌قیزیملا گزیردیک. آغ کؤینکلی، قارا ساچلێ بیر گنج منیم ایلگیمی چکمیشدی. اوزون – اوزون باخێشمیشدیق. عمی‌قیزیما اشاره ائتدیڲیمده، گۆلموشدوک. عمی‌قیزیم یاواشجا قولاغیما

مێزیلدامیشدی: «قیز! اوْنون یوْلداشینا دا من وۇرولموشام». گۆن باتێمیندا ساحیلده گزیشیب، هاوا قارالێنجا چادیرلارا چکیلردیک. گئجه باشلاناندان، چالقێچی‌لار چالماغا باشلاردی. هامی اوْنلاری چنبرله‌ییب، چپیک چالیب، اوْخویوب – اوْینایاردیلار. بو چال – های گئجه یارێلارینا دَک سورردی. سوْنرا چادیردا داراشلێق ایچینده، دیب – دیبه یاتاردیق.

شفق‌ سؤکۆلن چاغ، عمی‌قیزیملا گیزلیجه چادیردان چێخیب، اوْنلارلا ساحیلده دوْلانیب، گۆنشین دوْغماغینی سِیر ائدردیک. بیر هفته سَره – سَر اوْردا قالاردیق. ائوه قایێتماغیمیز گلمزدی

وزون زامان ایدی نامه گؤزله‌ییردیم. عمیمین اوْغلو اوْلمادیغیندان، عمی‌قیزیم مندن داها راحات ایدی. اوْنلارین ائولری‌نین آدرسینی وئرمیشدیک. نئچه سئری عمی‌قیزیمی گؤره‌نده سوْروشموشدوم، آنجاق نامه گلمه‌میشدی. بیر گئجه ننه‌م گیلین حیطینده، توت آغاجێ‌نین آلتیندا یئر سالیب، یاتمیشدیق. عمی‌قیزیم یاواشجا یوْرغانین آلتیندان ایکی پاکت چێخاردیب، گؤڲده اوْیناتدی: «قیز! آیدین‌دان نامه گلیب» – دئدی. «منیمکی ده بوداهااااا.»

بیرینجی بؤلۆمون دوامی

قوْلونو محکم قێرتدیم:

– به ایندی نییه دئییرسن؟… هایی گؤڲه گئتدی.

👇

⭕️قارغێش
✍یازان: #ویدا_حشمتی

بیرینجی بؤلۆمون دوامی

قوْلونو محکم قێرتدیم:
– به ایندی نییه دئییرسن؟…
هایی گؤڲه گئتدی.
یاواشجا صاندیقخانایا گئدیب، گیزلیجه نامه‌نی اوْخوماغا باشلادیم. بیر اوْندا ننه‌م گلیب، دئدی:
– تۇو اۆزووه باااا… اوْ اوغلاندان کاغیذ گلیب؟
باشیمدان بیر قازان قاینار سو تؤکدۆلر سانکی. دئمک بیزیم گیزلی – گیزلی باخێشمالاریمیز، دانێشمالاریمیز ننه‌مین گؤزۆندن قاچمامیش‌میش. دۆزدو آیدینی آتاما آنلاتدی، چوْخ ایشلرین باعثی ننه‌م اوْلدو، آما نامه‌لرین آردێ – آرخاسێ کسیلمه‌دی. بیرینده یازمیشدی «سنین عشقیوه سرباز گئتدیم».
کۆردوستاندان، ساواشین توفه – توفونده بئله، نامه یازاردی.
گؤزۆمۆ یوْلدان چکمه‌دن یاواش سسله دئدیم:
– بیلیرسیز!؟ من بیرینی آختاریرام. ایللردیر اوْنو گؤرمه‌میشم. اؤلکه‌نی ترک ائتمڲه مجبور اوْلدوغومدان.
اوْغلان دقّتینی یوْلدان چکمه‌دن دئدی:
– نییه اؤلکه‌نی ترک ائتدیز کی؟…
نئجه جواب وئره‌جَڲیمی دۆشوندوم. کؤیکسۆمۆ اؤتۆرۆب، دئدیم:
– اوْ زامانلار باشقا جۆر دۆشونوردوم. ایده‌آللاریم واریدی.
اوْغلان سؤزۆمۆ آنلامایان کیمی قاشلارێنی یوخاری آتدی.
– کیمی آختاریرسیز؟ تانیشدیر یا قوْهوم؟
– اسکی بیر دوست.
– باخ خانیم! اوْرالار چوْخداندی ویراندیر. کیمسه یاشامیر آرتیق.

#آردی_وار…

@SancaqDergisi
https://t.me/Sancaq_media/6335