هاممی نم کیمدیر
⭕️هاممی نَم کیمدیر! ✍شاعر: #سوسن_نوادهرضی 📸عکسی سالان: تبریزلی اۆلکر 📚(تبریزیم کیمی کتابیندان) ساعات قاباغیندایام… خیابان، سؤیۆنمهسهده، دؤیۆنۆر باهار نفسیندن. جماعت، یاشاملارینی ایتیریرلر یاشام پئشینده، یارێشیرجاسینا قاچیرکن. منسه، اۆزریمده آددیملایان یوْللاردا هۆرۆت – هۆرۆت زیللهنیرم هر قاباغیما گلنه، سنی گزیرم، اوموب کۆسۆرجهسینه. هئچکیم سن دڲیلسن، هاممی نَم کیمدیر! نم کیم ده سن دڲیلسن. دوْداقلار سولوق، باخیشلار […]
⭕️هاممی نَم کیمدیر!
✍شاعر: #سوسن_نوادهرضی
📸عکسی سالان: تبریزلی اۆلکر
📚(تبریزیم کیمی کتابیندان)
ساعات قاباغیندایام…
خیابان،
سؤیۆنمهسهده، دؤیۆنۆر باهار نفسیندن.
جماعت،
یاشاملارینی ایتیریرلر
یاشام پئشینده،
یارێشیرجاسینا قاچیرکن.
منسه،
اۆزریمده آددیملایان یوْللاردا
هۆرۆت – هۆرۆت زیللهنیرم هر قاباغیما گلنه،
سنی گزیرم، اوموب کۆسۆرجهسینه.
هئچکیم سن دڲیلسن،
هاممی نَم کیمدیر!
نم کیم ده سن دڲیلسن.
دوْداقلار سولوق،
باخیشلار سؤنۆک،
قاشقاباقلی آسلاق صوراتلار…
داریخدیرمازمی انسانی؟؟
سانێرام
سئوگینین ده اجلی گلیب، چاتمیشدیر آرتیق.
تین وۇرموش بو یئرلردن کسینجه اومودومو،
«یاکریم»لرین گۆلمک سسی گلیر
گؤڲ قۇرشاغێنین شئحلی نفسلریندن،
سێنیق گۆونجیمی
گۆنشه جان آتان کپنکلره نذر دئییرم،
و اؤلۆمجۆل گنجلیڲیمین قالێمجێل یاراسینی دا
آیێن رنگی آتمیشلیغینا.
تبریز یاغێشیندا
سئرچهلرله اوْیناشاراق یویوندو حسّلریم،
ساعتلردیر ساعات قاباغیندایام….
@SancaqDergisi
https://t.me/Sancaq_media/6364
