هفته لیک فالینیز

⭕️هفته‌لیک فالینیز

✍حاضیرلایان: #اوْلجای_مرآتی

🔸آغلار‌- گۆلر (قوْچ، فروردین): سرمایه‌لریزین چوْخالماسێ، مالێ باخێمدان ثباتا چاتماغێزا سبب اوْلاجاق. بو اۆزدن باشارێلاریز و ایش- گۆجوزه سهمان وئرماغا یاخجێ دۆشونون. مالی مسائلی مدیریت ائتدیڲیزده چوْخ احتیاطلێ اوْلون و منضبط حالدا چالێشین. عائله‌وی ایلتیشیملری بیرداها اینجه‌لیین و دۆز یوْلدا اوْلوب- اوْلماماغێزا اؤزۆز اؤز ویجانێزلا نظر وئرین. بلکه عاطفی باخێمدان ایشلرین دۆزلمه‌سی سیزین سئوگی‌یه اوْلان باخێشیزین دۆزلمه‌سینه باغلێدیر، اوْنو- بونو دانلامایێن!

🔸گۆلن‌آی (بۇغا، اردیبهشت): جسمیزین سیزه وئرن اویارێلارینی جدّی توتون و ساغلاملێغیزا اهمیت وئردیغیزا آرخایێن اوْلون. ایش و دینجلمک آراسێندا دنگه ساخلامالێ و ایش یئرینده آرامشلی بیر اوْرتام دۆزلتمه‌لیسیز. یارادێجی ایده‌لریز گۆنو- گۆندن گلیشمه‌نیز و ایشیزین دۆزگون ایره‌لی گئتمه‌سینه سبب اوْلار. یئری گلمیشکن اؤز باشارێلاریزی سرگی‌لیین و ایچیزده نه قدر اؤندرلیک قابلیتی اوْلدوغونو بیلیندیرین. یوخاری منصبلرده اوْلانلار سیزی ایزله‌ییر و سیزین چیخارلاریزی اینجه‌لییرلر. آرتێق اؤزۆزو اثبات ائتمک زمانێدیر.

🔸قیزاران آی (ائکیزلر، خرداد): هزینه‌لر و اولویتلریزی یئنی بیر باخێشلا یئنی‌دن اینجه‌لیین. بودجه‌زی حسابلایێن و گؤرۆن بو مقدار وارلێغیزی نئجه دۆزگون خرج‌لییه بیلرسیز. اوزون مدّتلی بیر برنامه دۆزنلیین و تله‌سیب، حساب- کتابسێز خرجله‌مک یئرینه، ساغلام بیر پلان چکین. بیرآز گئری قایێدیب اؤزۆز و ایشلریزی گؤزدن گئچیرتسز، نه قدر تدبیرلی، نه قدر ایش‌بیلن و نه قدر یئرینده خرج‌لدیکلریزی گؤررسیز و اؤزۆزو اۆرکدن بیر آلقێشلایارسیز. عاطفی باخێمدان دا، اؤز ایچیزه مراجعت ائتمه‌لیسیز. نه اوْلور اوْلسون سیز تکجه اؤزۆزو نظرده توتمالێسیز، سیز باشقالارێ‌نین دویغولارێنا سوْروملو دڲیلسیز، بوراخێن اؤز حاللارێنا، اوْنلار دا اؤز طالعلریله بارێشماغێ اؤڲره‌نجکلر.

🔸قوْرا پیشیرن (یئنگج، تیر): ایشیزه گؤره اوْلان آماجێزا چاتماغا یئنی آداملارلا تانێش اوْلمالێ و یئنی ایش‌بیرلیکلر باشلامالێسیز. انعطافلێ و یارادێجی اوْلماق، رئیس و اؤنملی آداملارێن نظرینی سیزه سارێ چکه‌جک و بو باشارێلاریزین باشلانقێج نقطه‌سی سایێلا بیلر. مالێ باخێمدان بیر مقدار ریسک ائتمه‌ڲین ضرری یوْخدور. سوبایلار بو هفته اجتماعی ایش و گؤرۆشلرینده، گله‌جک یاشاملارێنا اویغون اوْلان بیر نفرله تانێش اوْلا بیلرلر. دقتلی اولون

🔸قۇیرۇق دوْغان (آسلان، مرداد): بو هفته هر کسین نظری سیزه سارێ چکیلیر. هر کس سیزین ایشیزده اوْلان باشارێلاری گؤرۆر و آلقێشلایێر. تجربه و بیلگیلریز چوْخالدێقجا، ایره‌لی‌لمه‌ڲیز ده چوْخالێر. فرصتلری الدن وئرمه‌یین و اؤزل یاشامێزلا ایش حیاتێزی بیر- بیریله بارێشدیرین. حیات‌یوْلداشێزلا ایش موردینده دانێشین و گله‌جه‌ڲه اوْلان برنامه‌لریزی اوْنا دا آچێقلایێن، نهایتده اوْ سیزین حیاتێزین اوْرتاغێ اوْلدوغو اۆچون، چتینلیکلر و ایشیزین سوْرونلارێندا دا، سیزینله اوْلمالێدیر. بلکه سیز بونا هله اینامێرسی، آنجاق او اؤزۆ بئله دۆشونور.

🔸زۇمار (باشاق، شهریور): هم ایش و هم اؤزل باخێمدان یئنی‌لیکلر فکرینده‌سیز. اؤز اوزمانلێغیز ساحه‌ده بیلگی و باشارێزی چوْخالتدێقجا، مهارتلریز ده چوْخالێر. یئنی ایش باشلاماق، اؤلکه دێشینا گئتمک و یا ایندی اوْلان ایشیزی گئنیشلندیرمک ریسکینی قبول ائیلیین. نه زمانا کیمی اؤزۆزو بالاجا بیر یئرده سێخیشدیریب، ایره‌لی گئتمکدن قوْرخاجاقسێز؟ عاطفی باخێمدان بیر مقدار گؤرۆشوزو آچێقلادێب، کؤنلۆزو دینله‌ملیسیز. قوْرخمایێن اۆره‌ک نه سهو ائدر، نه ده آدامێ یانلێش یوْلا آپارار.

🔸خزل (ترازی، مهر): گلیرلریزی آرتێرماق و مالی باخێمدان دۆزلیش ائتمک یوْللارێزی دڲیشدیرمه‌لیسیز. مالی سئچیملر، چوْخ دقت ائتمه‌لی و احتیاطلا اۆز به اۆز اوْلمالێ مسأله‌لردیر. حیات‌یوْلداشێزلا بیر مقدار ایلتیشیمیزی گئنیش و درین ائتمه‌لیسیز. او سیزین حیاتێزین ان یاخێن آدامێ اوْلدوغو اۆچون، بوندان داها چوْخ صمیمت ایستییر سیزدن. ایش- گۆجوز ده سیزین اؤزۆزده اوْلان دڲیشیملردن، دڲیشیلیب، دۆزله بیلر. بو قدر انعطاف‌سیز اوْلمایێن، سیزین چئورزده‌کیلره احتیاجێز وار. تکجه ایندیکی دوروموزا گۆوه‌نمه‌یین!

🔸قیروْو (عقرب، آبان): ایش اوْرتاقلێغی و امکداشلێق چوْخ اؤنملیدیر. بو هفته سیز و سیزین دویغولارێزلا اویغون اوْلان بیر شخص ایله تانێش اوْلاجاقسێز. اوْنونلا ایش اوْرتاقلێغی ائتمک سیزین روحیه‌ز ایله توتور. اوْنون ایش گؤرمک و پول قازانماغا اوْلان گؤرۆشو سیزین گؤرۆشوزله اۆست- اۆسته گلیر و فرکانسلارێز بیر- بیریله توتور. ایشه اوْلان آماجلارێزا چاتماق اۆچون اؤز باشارێلاریزا اینانمالێ و چئورزده‌کیلرله ایلتیشیم یوْللارێنی تاپمالێسیز

🔸آزر (یای ، آذر): اؤز جسمی، ذهنی و عاطفی نیازلارێزی نظرده توتون و اوْنلارێن آراسێندا دنگه ساخلاماغا دۆشونون. جسمی باخێمدان اؤزۆزه دقتلی اوْلون و ساغلاملێغیزی قوْروماغا چالێشین اوْندا هم ایشلریزده قازانجێز چوْخ اوْلاجاق و هم سوْروملولوقلارێزی دۆز یئرینه یئتیره‌جکسیز. زمانێزی ایشلریزی گؤرمه‌ڲه صرف ائدین و ایش یئرینده دوروموزو محکم‌لشدیرمڲه چالێشین. بو هفته او قدر ایشه اوْداقلانێبسیز کی، عاطفی دویغولاری تام اونودوبسوز!

🔸چیلله (اوْغلاق، دی): بو هفته گؤرۆشلری یئنی‌لمک و ایلیشگی‌لره طراوت باغێشلاماق هفته‌سیدیر. هیجانلێ اوْلایلارێ مدیریت ائیلیین و ایلتیشیملرین گۆجلنمه‌سی اۆچون بیرلیکده قرار وئرین. سئوگیده یارانان بۆتون فرصتلری دڲرلندیرین، ایش یئرینده یئنی یوْل- یؤندمی نظرده توتون و عائله‌وی باخێمدان انعطافلێ داورانێن. ایش یئرینده چوْخلو گؤرمه‌لی ایشیز وار، البته سیز بو ایشه دائمی بیر ایش اوْلاراق باخمیرسیز و نظریزده وار بوندان داها یاخجێ، داها روحیه‌ز ایله توتان ایش باشلییاسێز. ندن اوْلماسێن؟ سیزین بونا هم چێخاریز وار هم باشارێز.

🔸دوْندۇران آی (قوْوا، بهمن): هر نه قدر اؤزۆزو تانێماغا چالێشساز، بیر اوْقدر ایشلریزده ایره‌لیله‌مڲیز چوْخ اوْلاجاق. بو هم ده سیزی عاطفی باخێمدان قاباغا آتێر و گلیشمه‌ڲیزه سبب اوْلور. بو هفته عزیزلریزله اوْلان ایلیشگیلریزده اوْلان استانداردلارێزی بیر داها اینجه‌لییب، ایلگینج سوْن‌اوجلارا چاتاجاقسێز. یئر و ملک اۆسته یاتێرم یاپماق منفعتلی اوْلاجاق. ایش یئرینده امکداشلارێزلا اوْلان ایلیشگی و امکداشلێغی برکیدین و بئله‌لیکله ایشلریزی دۆزگون ایره‌لی سۆردورون.

🔸بایرام (بالیقلار، اسفند): بو هفته امکداشلێق و فکرداشلێغیزی چوْخالتمالێسیز. بلکه دۆشونجه‌لریزی داها یاخجێ دیله گتیرمڲه یئنی‌دن فرصتیز اوْلدو. یئری گلمیشکن اؤزۆزون نه قدر یاخجێ بیر مدیر و لیدر اوْلماغێزی گؤرسه‌دیب،اثبات ائدین. قوْرخمادان آماجلارێزا دوْغرو گئدین و اؤنۆزه گلن بۆتون فرصتلری دڲرلندیرین. آرتێق چکینیب، اوتانماغێ بوراخێب، اؤز دۆشونجه، دویغو و نطریزی چئورزده‌کیلرله پایلاشمالێسیز. دویغولارێزی بیان ائتمکده صادق اوْلون.