⭕️بو حکایه اوشوندورنلردن ایدی!

🔸دقّت: یازیچی‌نین اورژینال املا طرزی و شخصی سلیقه‌سینه توْخونولمادی.

🔷کتابین آدی: گوموش تولکو ✍یازار: زینب آلپ‌ارسلان

چئویرن: فهیمه شیری

رسام: ووقار شیری ویراستار: آیدین سرداری‌نیا یایین

ائوی: ایلقار/ کیرپی کتابلاری ۱۴۰۲/ ۳۶ صفحه بوتون بویالی تورکویه ایله او تای آذربایجان اوشاق ادبیاتیندان یایینلانان کتابلاری همیشه گؤزوم آختارسادا، تاسوفله ایندییه‌دک الیمه ائله بیر شئی چاتماییبدیر. بو اوزدن بو کتابی گؤردوکده سئویندیم. ساغ اولسون کیرپی کی بو سفر تورکویه اوشاق ادبیاتینا باش ووروبدور. کیرپی کتابلارینا گؤره من بوندان اؤنجه ایلک کتابلارینی ۱۳۹۶ جی ایلده گؤردوکده مفصل بیر یازیم اولموشدو. او یازیدا تنقیدلریمله بیرگه وورغولامیشدیم کی هئچ اولماسین ظاهری باخیمدان کیرپی کتابلاری بوشقابا قویمالی کتابلار یایینلاییر. محتوا باخیمیندان گؤردویوم و بیلدیگیم‌جه هر بیر باخیمدان دوغما کتابی(متن و رسیملری اؤزوموزه عایید اولان کتابلار) دئمک اولار یوخ حدینده دیر؛ چوخ تاسوفله! ندنلری ده بللی دیر، کیرپینی ده قیناماق اولماز منجه! آما کیرپی‌نین ایستر کؤچورمه و یا آزاراق چئویرمه کتابلارینا گؤره چوخ سؤزوم وار. هئچ اولماسین منه هئچ بللی دئییل ادبی هنری باخیمدان هانسی اؤلچولر، معیارلار، و هانسی آماجلا کتابلاری یایینلاماق اوچون سئچیر و بو قدر گؤزل سویه‌ده باسدیریر؟ کیرپی کتابلارینی اینجه‌له‌ییب آنلادیغیم قدر، نه بیر اؤلچو ایله معیار گؤرونور، نه ده بیر خاص هدف! و آما الیمه چاتان بو سون اوچ کتاب؛ دیل و ائدیتورلوق باخیمیندان قاباقکی کتابلارین چوخونا گؤره آلقیشا لاییق دیر. اوبیری کتابلاردا اولان آخساقلیقلار؛ اؤزللیکله دیل قورولوشوغوندا اولان یانلیشلیقلار بو اوچ کتابلاردا یوخ حدینه چاتیبدیر. جالب بوراسی دیر کی کیرپی کتابلاری‌نین لاپ او ایلکین کتابلاریندان ویراستارین آدینی گؤروروک، کیرپی اولدن ویراستارین نه قدر اؤنملی اولدوغونو بیلیرمیش‌سه ده، سوروملو و باشاریلی ائدیتورون امکداشلیغینی قازانماقدا زورلوق چکیرمیش بلکه ده! بو حیکایه‌یه دؤندوکده ادبی باخیمدان چوخ ضعیف بولدوم بونو. حیکایه‌نین دئدیگینه گؤره؛ سویوقلوق‌لا یالنیزلیق مثالی اولان گوموش تولکو قارداش، ایستی‌لیک‌له سئوگی مثالی اولان قیزیل تولکو باجی ایله قارشیلاشاراق سئودالانیر و ایستی‌لیک اونون شاختا ائوینی قیزیشدیرینجا سویوق ووجودونو آلیشدیریر. تولکو قارداشین ائویم شاهانه بیر ویلادا یاشادیغینا باخمایاراق، فئر، شومینه‌دن توتاراق یاتاق اودانین استقبال دوشک‌لرینه‌دک هر شئی بوم بوز هنیرتیسیز دیر. هئچ سسی چیخمایان پیانو دا وار هله. گوموش تولکونون آفاقی انفسی بوزلاق کیمی هنیرتیسیز یاشامینی، حیکایه سئوگی ایله ایستی‌لیگه چئویره‌رک؛ اوشاقلارا محبت ایله عایله قورماق، عایله‌پرورلیک له یئتیم سئورلیک درسی وئرمک ایسته‌ییر سانکی! ایندی ندن بیر اوشاق یازاری اولاراق بئله بیر درسلری اوشاقلار اوچون او قدر گرکلی گؤروروک کی تکر تکر حیکایه‌لریمیزین قونوسو اولور هئچ بللی دئییل! سئودالانماق، عایله قورماق، یئتیم سئورلیک فالان، اؤیرتملی بیر شئی‌لرسه؛ بؤیوکلر اؤیرنملی دیرلر! بو اؤنملی نکته‌نی نظرده آلمایاراق زینب باجیمیز لازیم گؤروب و ایسته‌ییب ساندیغی بو یاشام و اخلاق درس لری حیکایه بیچیمینده اوشاق اوخوجولارینا وئرسین. اوشاقلار داها ماراقلانسین دئیه حیوان کاراکترلریندن فایدالانیرسادا هئچ باشاریلی دئییل. نه گوجلو یاددا قالان کاراکترلر یارادا بیلیر، نه ده ادبی باخیمدان گوجلو و ماراقلی حیکایه سؤیله‌یه بیلیر. اوزون سؤزون قیساسی اوشاغی، اوشاق ادبیاتینی ساده توتاراق تساهل ایله داورانماغین سونوجو بئله آشاغی سویه‌ده حیکایه‌لر اولور. سؤز اوزانماسین دئیه حیکایه‌نین آخساقلیقلارینا بوندان آرتیق توخونماق ایستمیرم. حیکایه منی نه قدر اوشوتسه ده، ووقار باجی* آقایی‌نین سو بویاسی ایله چکدیکی رسیم‌لری جانیمی او جور کی گرک قیزیشدیرا بیلمه‌دی. باخمایاراق کی سو بایاسی چوخ دوزگون بیر سئچیم ایمیش بو حیکایه‌یه و بعضی یئرلرده ده شیرین تصویرلر یاردیبدیر، آنجاق حیکایه‌نین یاردیمینا گلیب بیر شئی‌لر آرتیرانماییر اونا، ناغیل ایله پارالل قاباغا گئدیر، بلکه ده حیکایه‌نین جانسیز و قانسیز اولدوغو ال وئریشلی بیر امکان اونا وئرمیر. هر حالدا یاشاسین کیرپی بو اوچ کتابین رسیملرینی یئرلی باجی‌لاریمیزا تاپشیردیغی اوچون. اومورام اونلاردا کیرپی‌نین قدرینی بیلیب داها باشاریلی اولاراق، قالارغی اثرلر یاراتماق اوچون جانِ کؤنولدن چالیشسینلار! *اومورام خانیملارا باجی ایشلتمه‌ییم آجیقلارینا گلمز انشالله. حاجی احلام باجی‌نین «یار، یارا تن گلنده» کتابیندا «باهار باجی» یازماسی دیلیمه سالدی بو باجی سؤزونو! @MuncuqAz https://t.me/Sancaq_media/6351