بیرلیک نینی…(یئنی یئتمهلر اۆچون حکایه)
یازان: #رسول_قدیری (یئنی یئتمهلر اۆچون حکایه) دؤردۆنجو بؤلۆم گۆنش گؤیۆن دۆز اوْرتاسێندان یئره باخدیغی و کؤلگهسیز دیوارلارا شاخدێغی واخت، هر یئردن خبرسیز، آجێخمیش تۆلکۆ، توْیوق – خوْروزونا داداندێغی نینه طرف گلمکدهیدی. ساغ طرفده کئشیک چکن بئچه اوزاقدان اوْنو گؤردۆ. ایکی – اۆچ دفعه قاققێلداییب، یوْلاقدا گزیشن فَریک – بئچهلرین ایچری کئچمکلرینی ایستهیندن سوْنرا، قانادلارێنی هاوالاندێریب […]
یازان: #رسول_قدیری
(یئنی یئتمهلر اۆچون حکایه)
دؤردۆنجو بؤلۆم
گۆنش گؤیۆن دۆز اوْرتاسێندان یئره باخدیغی و کؤلگهسیز دیوارلارا شاخدێغی واخت، هر یئردن خبرسیز، آجێخمیش تۆلکۆ، توْیوق – خوْروزونا داداندێغی نینه طرف گلمکدهیدی. ساغ طرفده کئشیک چکن بئچه اوزاقدان اوْنو گؤردۆ. ایکی – اۆچ دفعه قاققێلداییب، یوْلاقدا گزیشن فَریک – بئچهلرین ایچری کئچمکلرینی ایستهیندن سوْنرا، قانادلارێنی هاوالاندێریب بیر بیرینه چالاراق، قرار وئریلدیڲی کیمی اۆچ دفعه اوجا سسله بانلادێ. کۆله بئچه اوْندان، تۆلکۆ دۆز – عَمللی حیطه یاخێنلاشمایینجا ائنمهمهڲینی ایستهدی. حتی اؤزۆ ده بیر آنلیق آتێلیب، اوْنون یانینا کئچدی. باشقا دیوارلاردا کئشیک چکن خوْروزلارلا بئچهلر دایانمادان نینه کئچدیلر. تۆلکۆنۆن گلیش یوْلونا یاخین دیوار اۆستدهکی بئچهلر ایسه، تۆلکۆ یوْلاغا گیرینجه دؤزۆب، یاخشیجا اؤزلرینی اوْنا گؤستردیلر. آجێخمیش تۆلکۆ بیر آز توْوونو چوْخالدینجا بئچهلر تئز حیطه آتێلیب، نینه طرف قاچدێلار. اؤنجه کئشیک چکن بئچه، آرخاسیجا دا کۆله بئچه نینه کئچدی. کۆله بئچه نینه کئچه-کئچه ایریبود فریڲه باخێب، – آی قیز گئریسی سنه باخیر! – دئدی. ایریبود فریک، – آرخایین اوْل، من ایشیمی باجاریرام. – دئییب، اوْنا گؤز ووراراق گۆلۆمسوندو.
تۆلکۆ حیط قاپێسینا چاتینجا توْوونو یاواشلاتدی. چوْخ احتیاطلا حیط قاپێسیندان بوْیلانیب، ایچرییه باخدی. نینین قاپێسیندا تکجه ایریبود فریک دوْلانیردی. اوْنون بودلارێنا گؤزلری ساتاشینجا آغزێ سۇلاندێ. اؤزۆ ایله -آخ! اوْ آغ، ایری بودلار نه قدر دادلێ اوْلا بیلر! – دۆشۆندۆ. بو قدر سسسیزلیک نوْرمال بیر حال اوْلماسا دا، آج تۆلکۆ بونو باشا دۆشه بیلمهدی. آجلێق فیکرینی جایدێرمیشدی. سینهرک فریڲه طرف یئریمَڲه باشلادی. فریک گؤزۆنۆن اوجو ایله اوْنو گؤرۆرسه ده اؤزۆنۆ گؤرمهمزلیڲه وورموشدو. یئردن دن دؤشۆرمک بهانهسی ایله آرخا طرفینی اوْنا گؤستریب، آغزێنین سویونو آخێدیردی. تۆلکۆ یئترینجه یاخێنلاشاندان سوْنرا، فریک آراملێقلا یارێمآچێق قاپێدان نینه کئچیب دایانمادان یوخاری رفه آتێلاراق لاری بئچهیه – گلیر حاضیر اوْل! – دئدی.
تۆلکۆنون ایچری کئچمهڲی چوْخ چکمهدی. تۆلکۆ ایچرییه کئچر-کئچمز، قاپی آرخاسیندا حاضر دایانان لاری بئچه توْولو بیر حرکتله یوخاری آتێلیب، جۆت آیاقلاری ایله نینین قاپێسینی اؤرتدۆ. نینین ایچریسی قاپقارانلیق اوْلدو. تۆلکۆ نینین اوْرتاسینا چاتێنجا، یوخاریدا اوْتوران کۆله بئچه – ایندی- دئیینجه ایڲیرمی ایکی قوش بیر آندا تۆلکۆنۆن اۆستۆنه آتیلدیلار. کۆله بئچه اؤزۆ آتێلماییب، اۆستدن دوروما گؤز قوْیوردو.
لاری بئچه ده آشاغیدایکن آتێلانلارا قوْشولوب، تۆلکۆیه طرف یۆڲۆردۆ. هله گؤزلری قارانلیغا آلێشمایان گیج قالمیش تۆلکۆ، ایستر-ایستهمز ساغ اۆزۆ اۆسته یوخاری طرفه، یعنی قانادلارین سسی گلن سمته باخماق ایسترکن بئچهلرین بیرینین دیرناغی ساغ گؤزۆنه توْخونوب، اوْنو ساغ گؤزۆندن ائتدی. آشاغێیا دۆشن بئچهلردن اۇزوندیمدیک بئچه، تۆلکۆیه ماجال وئرمهدن، اوْنون سوْل گؤزۆنۆ ده دیمدیڲینین گۆجلۆ ضربهسی ایله چێخارتدی. هر ایکی گؤزۆنۆ ایلک یۆرۆشده ألدن وئرن تۆلکۆ، بیلمز و گؤرمزجهسینه گؤیده جایناقلارینی اوْ طرف – بو طرفه آتماغا باشلادێ. اوْنون ایتی جایناقلاری ایله دیشلری قوشلارین اۆچۆنۆ آغێر یارالادێ.
https://t.me/Sancaq_media/6338
https://t.me/Sancaq_media/6338
