بیرلیک نینی…

بیرلیک نینی…

(یئنی یئتمه‌لر اۆچون حکایه)

بئشینجی بؤلۆم

کۆله بئچه اۆستدن – هامێ یوخاری – باغێران کیمی، نفس نفس ووران توْیوق – خوْروزلارلا، فریک – بئچه‌لر، بیرَ‌ر – بیر‌ر اوچوب، رف‌لره قوْنوشدولار. یارالێلار سۆرۆنۆب، اؤزلرینی بوجاقلارا چاتدیردیلار. گیجلمیش، قانێ سۆزن گؤزلری آجێشان تۆلکۆ داها آنجاق نیندن چیخیب، قاچماغی دۆشۆنوردو. اوْنا گؤره ده توْولا قاچیب، بو دیوارا – اوْ دیوارا اؤزۆنۆ چیرپیردی. اوْن – اوْن ایکی دقیقه‌نین ایچینده اوْ قدر بیلمزدن اؤزۆنۆ دیوارلارا چێرپدی کی، هوشدان گئدیب نینین اوْرتاسیندا یئره دۆشدۆ. اوْ یئره دۆشن کیمی کۆله بئچه، «هادی! قورتارالیم بو ایشی.» – دئدی. بو کز قالان توْیوق – خوْروزلارلا، فریک – بئچه‌لرین هامێسی آشاغێ دۆشوب، تۆلکونون بۆتون بدنینی زوْرلو ضربه‌لرله دیمدیکله‌مَـڲه باشلادیلار. آز کئچمه‌دن تۆلکونون جانێ چیخیب، بدنی سوْیودو. قوشلار تۆلکونون اؤلدۆڲۆندن آرخایین اوْلان کیمی حیطه چیخیب، حیطین ائن – بوْیونو قاچاراق ظفرلرینی قوتلادیلار. نینده قالانلار، تکجه آغ‌ساققال خوْروز، آناج توْیوق و کۆله بئچه اوْلدو. اوْنلار یارالانان بیر توْیوق، بیر فریک و بیر بئچه‌نین باشی اۆستۆنه کئچدیلر. کۆله ‌بئچه چوْخ حوزونلو حالدا اوْنلارین باشێ اۆستۆنده دایانیب، گؤز یاشێ تؤکۆردۆ. آغ‌ساققال خوْروز اوْنا یاخێنلاشیب، قانادینی بوْینونا سالاراق، «اۆزۆلمه بئچم! من اینانمامیشدیم، آما قصورسوز پلانێ‌نین گۆجۆنه بؤیۆک ایش باشارمیشیق. هم آمانسیز دشمنیمیزین جانێنی آلدیق، هم ده بو نینه گؤزۆنۆ تیکن باشقا یێرتیجی حیوانلارا دا درس وئرمیش اوْلموشوق. هم ده منیم کیمی دُورانینی سوْوموشلارا درس اوْلدو بو ظفریمیز. اینانیرام آرتیق گنجلره اینانمالیییق.» – دئییب، اوْنو اوْخشادی.

***

توْیوق – خوْروزلارلا، فریک – بئچه‌لر، آخشاما کیمی حیطده گزیشدیلر؛ نینه گیریب، تۆلکونون لئشینه باخیب چێخدیلار. آخشام اؤینه‌سی ائو یییه‌سی ائوه قایێدانا کیمی، یارالێ بئچه اؤلمۆشدۆ. ائو یییه‌سی حیطه گیرینجه، نین ایله قوشلارین دۇرومونو حال‌باحال گؤردۆ. قوشلار عجاییب سسلر چێخاردیردیلار. کیشی قۇشقولانیب نینه گیرن کیمی تۆلکونون لئشینی، اؤلمۆش بئچه‌نی و یارالێ توْیوقلا فریـڲی گؤردۆ. کیشی‌نین آغزێ آچیق قالمیشدی. بیر توْو اؤزۆنه گله بیلمه‌دی. نه‌لر باش وئردیڲینه اینانا بیلمیردی. بیر آزدان اؤزۆنه گلیب ائوین ایچینه قاچدی. بیر بیچاقلا قایێتدی. تۆلکو آغیر زده‌له‌دیڲی حیوانلاری یئیه بیلمه‌دیکلرینی بیلیردی؛ آما اوْنلار آرتیق آجی چکمه‌سینلر دئیه، یوبانمادان یارالێ فریکله توْیوغون باشێنی حوض باشێندا کسدی. تۆلکونون لئشینی حیطه سۆرویوب، اؤنجه قویروغونو بدنیندن آیێردی. قالان لئشینی ائوین ائشیڲینه سۆرویوب، ائودن اوزاق بیر یئره آتدی. سوْنرا بیر آن قهرمانجاسینا جانلارینی ایتیرن قوشلارین لئشینی نه ائده‌جَـڲینی دۆشوندو. اؤزۆ ایله (اوْنلارین لئشی، یێرتیجی تۆلکونون لئشی‌نین یانێنا آتێلیب، باشقا حیوانلارا یئم اوْلمامالی‌دیر)- دئدی. بۆتون بونلاری دۆشونندن سوْنرا، نینین اوْرتاسیندا بیر چالا قازێب، موردار اوْلموش بئچه و باشلارینی کسدیڲی فریکله توْیوغو سایغی ایله همین چالادا قویلادی.

تۆلکودن قالان قویروغون کسیک یئرینی یاخشیجا دۇزلایاندان سوْنرا، نینین قاپیسی‌نین ائشیک طرفینه مێخلادی. اوْ قویروق، هله ده قاپی هر آچیلیب باغلاناندا دالغانێر…

#سون

۰۹- آغلارگۆلر – ۱۳۹۷