نتایج بیشتر...
یازان: #فرخ_جرایدی (یوْرغون) 📚آلما اؤیکۆ توْپلوسوندان نئچه آی بوْش – بوْشونا گزدیکدن سوْنرا سوْنوندا اؤزۆنه بیر ایش تاپمیشدی. یئنی ایش یئرینی چوْخ سئومیشدی، ایشلر بورادا بیراز یۆنگۆل گؤرسهنیردی، همده ایشلهینلرین چوْخو قادیْن ایدی؛ اؤزۆنۆ بئله توْپلوملاردا داها راحت حسّ ائدردی. دۆنن چوْخ دوْلانیب یوْرولموشدو، گئجهنی داش کیمی دۆشۆب اۆزۆ قوُیلو یاتمیشدی سحره قدر. ایندیسه ساعتین […]
یازان: #فرخ_جرایدی (یوْرغون) 📚آلما اؤیکۆ توْپلوسوندان نئچه آی بوْش – بوْشونا گزدیکدن سوْنرا سوْنوندا اؤزۆنه بیر ایش تاپمیشدی. یئنی ایش یئرینی چوْخ سئومیشدی، ایشلر بورادا بیراز یۆنگۆل گؤرسهنیردی، همده ایشلهینلرین چوْخو قادیْن ایدی؛ اؤزۆنۆ بئله توْپلوملاردا داها راحت حسّ ائدردی. دۆنن چوْخ دوْلانیب یوْرولموشدو، گئجهنی داش کیمی دۆشۆب اۆزۆ قوُیلو یاتمیشدی سحره قدر. ایندیسه ساعتین چالارێ اوْنو یوخودان اوْیاتمیشدی. یاتاغین ایچینده گؤزلری یاریم آچیق اوزانیب، هله یاخشی اوْیانمامێشدی، هردن بیر گؤزلرینی یوموب مۆرگۆلهنیردی. آناسی اوْتاغین قاپیسینی چالیب، «بالا دوُرموسان؟» دئیه سوْروشدو. اسنهیه – اسنهیه، «هه گلیرم.» – دئدی. ساعته باخدیقدا هله بیراز وقت وار ایدی، گئجه اۆزۆ قوُیلو یاتدیغیندان دیزلری گیزیلدهییردی، آیاغینین باش بارماقلاری کئییمیشدی. اینجه اللری ایله بیراز دیزلری ایله بارماقلارینی اؤوکَـلهدی. پالتارینی اڲنینه گئییب یاتاقدان قالخیب، اوْنو یێغیشدیردی. هر گۆنه تای اؤز ال یازماسی اوْلان دیوارین اۆزهریندهکی یازینی اوْخودو، «یا گؤرۆندۆڲۆن کیمی اوْل، یا اوْلدوغون کیمی گؤرۆن.» (حضرت مولانا) ال – اۆزونو یوماقدان اؤترۆ اوْتاقدان چیخدی. آناسی سُفرهنی دؤشهییردی. آنایا سلام وئریب، گۆلۆمسهیهرک گؤز ووُردو. آنا دا اوْنا اؤپۆجۆک آتاراق قارشیلادی. ال – اۆزونو یوُووب ایسلاق اللرینی یئنی قێسالتمیش ساچلارینا چکدی، ایشسیز اوْلان چاغلار ساچلارینی اوْلدوقجا اوُزالداردی. گۆزگۆ اؤنۆنده دوروب ساچلارینی دارایارکن گؤزۆ ساغ یاناغێنداکی قارا بَنـه ساتاشدی. اؤز – اؤزۆنه، «گئنه یئنی بیر ایش یئری، گئنه آغیر باخیشلار، گئنه آتماجا سؤزلر سنی گؤزلۆر آیبَنیز خانیم!» – دئدی. باخیشلاری گؤزگۆده گؤرۆنن گؤزلره دالدێ، گؤزۆنۆن اوجونا توْپلانمیش بیر داملا گؤز یاشی اوْنو یئرینده دوْندوردو. گؤزلرینی یوموب، درین بیر نفسله یاندیریجی بیر آه چکدی، اوْنو یاشام بوْیو سارسێدان، همیشهلیک اینجیدن آجێلار اۆرهڲیندن چێخان آهلا، یئنه گؤز یاشینا دؤنۆب گؤزۆندن آخدێ؛ قیزلیغین اینجه دوُیغولارینی، ارککلیڲین توْپلوم دا اوْلان اؤزگۆرلۆک دویغوسونو، اۆزونده ایز سالمیش گؤز یاشینی، اینجه بارماقلاری ایله اۆزۆ یوخاری سیلهرک بئینیندن چیخارتدی. نه یازیق کی بو آجێلاری سادهجه اؤزۆ ایله اؤزۆنه تایلار دۆشونه بیلیردی. کیملیکده آیبَنیز یازیلماسایدی دا، ائوده هامی آیبنیز سسلردی. همیشه گؤرۆندۆڲۆ کیمی اوْلماق ایستردی. آناسینین سسی ایله اؤزۆنه گلدی. – «ائلدنیز! بالا تئز گل، گئجیکرسن.» «گلیرم قاداسی!» – دئیه یئمک اۆچۆن آنانین یانینا گئتدی. گۆله – گۆله «آی آرواد! هله ائلدنیز اوْلمامیشام هاااا! – دئدی. آنا، بَنلی یاناغیندان ایکی بارماق اوجو ایله یاواشجا قیرتاراق، دئدی: – «دا جێغالیق یوْخوموز، ایشه گئدیب گلنه کیمی ائلدنیز سن.» ایکیسی ده گۆلوشدولر. بیراز چای – چؤرک یئییب، سوْن اوْلاراق گئنه گۆزگونون اؤنۆنه کئچدی. آغ آلنینین اوْرتاسی بیلینر – بیلینمز قات یئمیشدی، چاتما قاشلاری بادام گؤزلرینین سوْنونا کیمی اوزانمیشدی، اینجه بوُرونو تانرینین لاپ اوْ خوْش چاغی یارانیب دئیهسن، اؤزۆ همیشه بئله دئییب گۆلردی، قیرمیز دوْداقلاری بلکه اۆزونون أن چوْخ گؤز چکدیرن یئری ایدی، خێردا چنهسی گؤزه چوْخ گلمهدن، بیراز دیک ایدی. اؤزۆنه گؤز ووُروب، آناسی ائشیده بیلن بیر سسله دئدی: – «واه واه! قیز اوْلسایدیم، ایندی ائلچیلر قاپینی یئریندن چیخارتمیشدی». اڲنیندهکی گئنیش کؤینَـڲی دؤشلرینین ایری اوْلدوغونو بللی ائتمیردی، آما اینجه بدنینده هر نئجه اوْلموش – اوْلسادا گؤزه ووُروردو، بو قوْنودا دئییلن سؤزلره آلیشمیشدی. آنا بالاسینی یوْلا سالماق اۆچون قاپییا گلدی. سوْن اوْلاراق بیرده «سوْرونونو دئمیسن دا؟»
اشینی ترپهدیب، «هه باشا دۆشسهلر دئمیشم» – دئییب، دیمدیکلی بؤرکۆنۆ باشینا قوْیا – قوْیا هلهلیکلشدی. ایش یئرینه یئتیشجَـڲین ایشچیلرین چوْخونو قاپی آغزیندا گؤردۆ، سانکی هاممی اوْنو گؤزلۆرموش کیمی ایشچیلر بوْشونا دوْلانیردیلار، باشینی آشاغی تیکیب دیمدیکلی بؤرکۆنۆ قاشلارینین اۆستۆنه کیمی چکیب دایانمادان گئتدی. ایشچیلرین آغیر باخیشلارینی حس ائدیردی. نه قدر بئله باخیشلارا آلێشمیش اوْلسادا یئنهده اوْنا آغیر گلیردی. باخانلارین بیر سێراسی دایاز دۆشۆنجلی اوْلاراق ائلدنیزی بارماقلا بیربیرلرینه گؤستهریب گۆلوردو، بیرازی ایسه حیفسهلنیردی. ایشی کیچیک بیر اوْتاقدایدی، ۶ قادیْن، ایکی ارکک ایشچی، ایشچیباشی ایله ائلدنیز. چاتدیقدا ایشچیباشی «ائلدنیز ییلماز» – دئیه سسلهنرک بوُنو چاغیریب، «سنسن؟» دئیه سوْروشدو. «ائلهدیر منم» – دئدی. اینجه سسی ایله دوُروشوغو ایشچیباشینین دوْداغیندا گۆلۆش یاراتدی، بو گۆلۆش کسگین پیچاق کیمی ائلدنیزین اۆرهڲینه سانجیلدی، آما همیشهکی کیمی اۆزه وئرمهییب قَهَرینی اوُتدو. «ایکی جنسیّتلی اوْلدوغون اۆچون بوُرادا بو یۆنگۆل ایشی سنه وئریبلر، یوْخسا اوْ بیری کیشیلر کیمی گرک آخشاما کیمی گۆن قاباغیندا قارالایدین! بونو دئمکدن آماجێم بودور کی، ایشینین دڲرینی بیلهسن. یاخشی دا توُتماییم گئت ایشینه باشلا.» ائلدنیز گؤز یاشلارینی گؤزۆنده ساخلایاراق، گئدیب ایشه باشلادی. #سون
نشانی ایمیل شما منتشر نخواهد شد. بخشهای موردنیاز علامتگذاری شدهاند *
دیدگاه *
نظرتان را بیان کنید
ذخیره نام، ایمیل و وبسایت من در مرورگر برای زمانی که دوباره دیدگاهی مینویسم.