یازان: #نورالدین_مقدم (آیدین دومان) ائلیار ایله ایلقار بیر حیَطده یاشێیردیلار. اوْنلار ایکی یوْلداش، ایکی قوْنشو ایدیلر. بو ایکی یوْلداش گۆن اوْلمازدی کی، بیر بیرلری ایله اوْیناماسینلار. آنجاق ایکی گۆن ایدی کی، آرالارێنا سَرینلیک دۆشموشدو. نییهسینی سوْروشساز، دئیهجڲم: هئچ زاد، هئچ زاد … بوْش یئره، ماهنا(بهانه)….؛ نه بیلیم! سن قاچاندا منیم آیاغێمی آیاقلادێن، منی برک ایتهلهدین! […]
یازان: #نورالدین_مقدم (آیدین دومان)
ائلیار ایله ایلقار بیر حیَطده یاشێیردیلار. اوْنلار ایکی یوْلداش، ایکی قوْنشو ایدیلر.
بو ایکی یوْلداش گۆن اوْلمازدی کی، بیر بیرلری ایله اوْیناماسینلار. آنجاق ایکی گۆن ایدی کی، آرالارێنا سَرینلیک دۆشموشدو. نییهسینی سوْروشساز، دئیهجڲم: هئچ زاد، هئچ زاد … بوْش یئره، ماهنا(بهانه)….؛ نه بیلیم! سن قاچاندا منیم آیاغێمی آیاقلادێن، منی برک ایتهلهدین! اوْیوندا دَجللیک ائلهدین! چاغێردیم اوْیناماغا، گلمهدین!.. بو ماهنالاردان بیری… بلکه ده باشقا بیر سؤز اوْنلارین آراسێنی وورموشدو.
اوْ گۆن ائلیارین آتاسێ اوْنا یئنی بیر توْپ آلمێشدی. اوْ توْپو گؤتۆردۆ. هر گۆن اوْینادێقلاری چاغدا حیَطه چێخدی. ایلقاردا بیرآزدان حیطه گلدی. بیردن یادلارێنا دۆشدو کی، اوْنلار بیر بیرلری ایله کۆسۆلودورلر. حیطلرینده بالا باغچانین اوْ طرفینده ائلیار، بو طرفینده ایسه ایلقار، کۆسولو کیمی اوْتوردولار. آنجاق گؤز آلتێ آرادا بیر بیرلرینه باخێردیلار. ائلیار توْپو آیاغێنین یانینا قوْیموشدو. بالاجا یئل ده اسیردی. توْپ دێغیرلانا – دێغیرلانا گئتدی ایلقارین آیاغێنین یانینا. ایلقار باخدێ گؤردۆ، توْپ تازادی، قشنگ ده رنگی وار. توْپدان برک خوْشو گلدی. اؤزۆ ایستهمهدن آیاغێ توْپا بالا بیرضربه وۇردو.
توْپ دێغیرلانا – دێغیرلانا گئتدی ائلیارین آیاغێنین یانینا. ائلیارین آیاغێ ترپهشن کیمی اوْلدو، دَڲدی توْپا، توْپ دێغیرلانا – دێغیرلانا گئتدی ایلقارین آیاغێنین یانینا. ایلقار ایسه بالا ضربه ایله توْپو یوْللادی ائلیارا. ائلیار ایسه ایلقارا…
اوْنلار توْپو بیر نئچه دؤنه بیر بیرلرینه وۇراندان سوْنرا قاه – قاه چکیب، گۆلدولر. دوروب گۆندهکینه تای ایکی یوْلداش کیمی بیر ساعاتاجان توْپ اوْینادیلار.