نتایج بیشتر...
یازان: #آیدین_خلفی_زینگیر 📸 عکس: فرشید علیزاده اۆچۆنجۆ بؤلۆم 🔸شریف: بیر قاریش ائنینده و بیر قۇلاج بوْیوندا توْخونمادیر کی، کیشیلر و خانیملار اوْنو ایلین سوْیۇق آیلاریندا بوْیۇنلارینا دوْلاییرلار. شریف قوْشا میل واسطهسیله قۇزۇ گۆزمیندن الده توْخۇنور. فارسجا شالگردن دئییلیر. 🔸تر کؤینک (جان کؤینک): فارسجا عرقگیر دئییلن گئییمه تۆرکجه تَر کؤینک یا جان کؤینک دئییلیر. پالتارلارین آلتیندان […]
یازان: #آیدین_خلفی_زینگیر
📸 عکس: فرشید علیزاده
اۆچۆنجۆ بؤلۆم
🔸شریف: بیر قاریش ائنینده و بیر قۇلاج بوْیوندا توْخونمادیر کی، کیشیلر و خانیملار اوْنو ایلین سوْیۇق آیلاریندا بوْیۇنلارینا دوْلاییرلار. شریف قوْشا میل واسطهسیله قۇزۇ گۆزمیندن الده توْخۇنور. فارسجا شالگردن دئییلیر.
🔸تر کؤینک (جان کؤینک): فارسجا عرقگیر دئییلن گئییمه تۆرکجه تَر کؤینک یا جان کؤینک دئییلیر. پالتارلارین آلتیندان گئییلیر.
🔸تۇمان: تۇمان تۆنکه کیمی و اوْ مالدان اوْلۇردو. اما قیچی اۇزۇن و شالوار بوْیدا اوْلۇردو. تومانی کیشیلر شالوارین آلتیندان گئییردیلر و گئجهلر ائوده دینجلن چاغ اوْنو گئییب اوْتۇرۇردولار. خانیملارین کؤینک آلتیندان، قۇرشاقدان آشاغا اوْلان گئیدیڲی اؤزل گئییم ده تۇمان آدلانیر.
🔸تۇمانباغی: بیر آرشین بوْیۇندا بالاجا و اینجه بۆتؤو هانا آغاجی حاضرلانیردی. ایکی بارماقدان بیر آزجا آز ائنینده آیری – آیری اوْنون اۆستۆنده هانا اۇزانیردی. پامبیق ساپدان اوْنو بیر آرشیندن بیر آز آرتیق تکرار کیلیم سایاغی توْخۇیوردولار. سوْنرا اوْنلاری وئردیکلری آرادان آییریردیلار و ایشلنمڲه حاضر اوْلۇردو. اوْنو قیزلار، گلینلر، خانیملار تۇماندا اؤنجهدن حاضرلادیغی یئره سالیب تومانلارینی باغلاییردیلار. دئمهلی تۇمانباغی ایندیکی کِشین یئرینی وئریر. قیزلار گلین گئدن چاغ، ائوین آناسی اوْنون جِهیزینین اۆستۆنده تۇمانباغی دا قوْیۇرمۇش. کیشیلر ده تۇمانباغیندان شالوار و تومانلارینی باغلاماغا استفاده ائدردیلر.
🔸تۇمان – کؤینک: تۇمان – کؤینک مۇغان خانیملارینین و قیز – گلینلرینین اۇزاق زاماندان بری ملّی گئییمی اوْلوب. آنجاق سوْن بئش اوْن ایلده بلوز – دامن بو آرالارا گلیب، چیخاندان سوْنرا بو گئییمین یئرینی آلیبدیر. تۇمان بیر اؤزل گئییمدیر کی، سککیز، اوْن یا اوْن ایکی «تاختا»دان دۆزلیر. هر تاختا یاریم آرشینا قدر اوْلور. بۇنو تیکندن سوْنرا «لیفه» دئییلن یئرینه، بئلین اؤلچۆسۆندن بیرآز آرتیق چین آتیب بۆزۆرلر. بو آرتیق اؤلچۆ گئییب، چیخارمانی راحاتلاشدیریر. بوْشلۇغۇ دا «تۇمانباغی» برکیدیر. تۇمان ایندیکی دامن کیمی اما چینلی بیر گئییم اوْلور. تۇمانین لیفهسی قۇرشاقدا قالیر و تۇمانباغی ایله برکیییب بوْشالیر. تۇمانین آیاغ اۇجۇنا «قییی» دئییلیر. تۇمانین قیییسینا «قارا» قییی تیکیرلر. قییی تۇمانین آیاغینی گؤزل گؤسترمکدن باشقا اوْنو سؤکۆلمڲه قوْیمور. تۇمانین چوْخ چینلی اوْلماسی اوْنون هر شرایطده قالخیب، اؤرتۆڲۆن پوْزولماسینا مانع اوْلور. کؤینک ایسه بوْیۇندان آیاغا قدر (گئین خانیمین بوْیو قدر)، بۆتؤو بیر گئییم اوْلور. قوْللۇ و یاخاسیندا ایکی یا اۆچ دۆڲمه اوْلور. کؤینڲی تۇمانین اۆستۆندن گئییرلر. تۇمان – کؤینک ایندی ده هئچ اوْلماسا کندلریمیزده گئنیش استفاده اوْلونور. آذربایجان قادینلاری تۇمان – کؤینک، کلاغایی و آلینلیق، دؤشلۆک و یل گئییملری ایله تصوّر اوْلۇنور.
🔸یای باشماغی: فارسجا دمپایی دئییلن آیاققابینا یای باشماغی دئییلیر. دابانی اوْلمۇر و اوْیان – بۇیانی آچیق اوْلور. قۇزئیده «شاپ – شاپ» دئییلیر. بیر آیاققابی دا واریمیزدیر کی، یایدا گئییلیر و اوْنا قاییشلی باشماق دئییلیر.
🔸یایلیق – لَچک: آدیندان بللی اوْلدوغو کیمی یۇخا و بالاجا اؤرتۆک اوْلۇردو. خانیملار – قیزلار اوْنو یایین ایستی هاوالاریندا اؤرتدۆکلرینه گؤره یایلیق آدلانیر. بو اؤرتۆک دؤرد بۇجاق یا اۆچ بۇجاق اوْلۇردۇ. دؤرد بۇجاغی دا اۆج – اۆجه قاتلاییب، اۆچ بۇجاق (لچک) ائدیب ساریییردیلار. دئمهلی اۆچ بۇجاق شکلینده اوْلان یایلیغا لچک دئییلیر. ایندی ده بو آددا و بو شکیلده، خالچانین ایچ بۇجاغیندا ناخیش وار. (لچک تُرنج). ماهنیمیزدا بئله دئییلیر:
«یایلیغی آلدی یاریم بوْینۇنا سالدی یاریم قییغاجی باخماق ایله جانیمی آلدی یاریم»
🔸یل: خانیملارین سئتره شکیلینده بیر گئییملری اوْلاردی، اوْنا یل دییردیلر. یل سئترهدن بیرآز اینجه اوْلۇردو. خانیملار اوْنو سوْیۇق آیلاردا دؤشلۆڲۆن یا اوْ بیری گئییملرینین اۆستۆندن گئییردیلر. بو گئییم ایندی چوْخ آز گؤرۆنۆر.
نشانی ایمیل شما منتشر نخواهد شد. بخشهای موردنیاز علامتگذاری شدهاند *
دیدگاه *
نظرتان را بیان کنید
ذخیره نام، ایمیل و وبسایت من در مرورگر برای زمانی که دوباره دیدگاهی مینویسم.