نتایج بیشتر...
بیرینجی بؤلۆم 🔷شاه داغیم، چال پاپاغیم: دۆشر و داغ سراسکند کندلرینده ایلک معلملیک گۆنلریمین خاطرهلریندن بیر بؤلوم توْپلۇم (جامعه) کیچیکدیر، هیچ اۆست آشاغیسی اولمادان. تکجه ایکی اۆچ نفرین اینک یا قوْیون یا دا نئچه آتی وار ایدی. کلاسا یاخین کیچیک بیر قیز اوشاغی الیمی اوْخوموشدو! هر گۆن یئمک وقتینده بیر آیاقدا چاریق، بیرینده باشماق اؤزۆنۆ […]
بیرینجی بؤلۆم 🔷شاه داغیم، چال پاپاغیم: دۆشر و داغ سراسکند کندلرینده ایلک معلملیک گۆنلریمین خاطرهلریندن بیر بؤلوم توْپلۇم (جامعه) کیچیکدیر، هیچ اۆست آشاغیسی اولمادان. تکجه ایکی اۆچ نفرین اینک یا قوْیون یا دا نئچه آتی وار ایدی. کلاسا یاخین کیچیک بیر قیز اوشاغی الیمی اوْخوموشدو! هر گۆن یئمک وقتینده بیر آیاقدا چاریق، بیرینده باشماق اؤزۆنۆ کلاسا یئتیریب و یئمک پایینی آلیب گئدیردی. بیر گۆن اوْنا دئدیم: – نیه درس اوْخوماغا گلمیرسن؟ کلاسا گلمهسن یئمک پایی سنه وئرمهیهجگم. قوْرخا – قوْرخا و دوْداقلاری تیترهیه تیترهیه دئدی: “آخی قاغام قوْیمور”. سؤزۆمدن پشیمان اوْلدوم. ساچلارینی اوْخشاییب دئدیم: – هر گون گلیب یئمک پایینی آل. بیردن بیره باشلادی آغلاماغا ایچینی چکه چکه تیترک سسله دئدی: – ایستهییرم درس اوْخویام. آتام قوْیمور. ایکی اۆچ نفردن سوْروشدوقدا بیرینجی گۆن منیمله آتیشان اوْ جاهل بئیینلی کندلینین قیزی اوْلدوغو بللی اولدو. او گئجه افروز ننهنین قوْناغی ایدیم. قیزین احوالاتین اوْنا دئدیم. سحر کلاسا گئدنده افروز ننه قیزلا برابر کلاسین قاپیسیندا دورموشدو. منی گؤرجک دئدی: – حبیب بڲ، آتاسی راضیلاشدی. راضیلاشمایا دا بیلمزدی. او دؤنملرده اؤڲرتمنلیک حقوقو مین بئش یۆز ایدی و اۆچدن ایکیسینی بیریکدیریب، گلهجگه ساخلاماق اوْلاردی. جایزه وئرمک آدینا دؤرت جۆت باشماق آلیب، دؤرد اؤڲرنجییه وئردیم. بیری ده او قیز ایدی. (آتاسینین آدین و اؤز آدین بوردا یازمیرام). بیر آز دۆشردن اوزاقلاشاق، ۱۹ ایل سونراسی… دئدیلر کرجین مهر شهرینده گئدیب معلملیک ائتمهلییَم. سحر ناظم بڲ کلاسلارین حاضر اولدوغونو دئدی و معلملرله کلاسلارا گئدیردیک، بیر چادرالی قیز یاخینا گلیب دئدی: – سیز تۆرکسوز؟ – بلی بویرون؟ – سیز سرکندلیسیز؟ دۆشرده درس وئریبسیز؟ من بلی دئمهمیش دئدی: من من … یام. سیزین شاگردیز! چرشابلا اۆزنو توتموشدو. آغلادی و ائله بیل مئشهده بیر آغاجی کسن کیمی اؤزۆنۆ سالدی صندلین اۆستونه. مدیر و باشقالاری آغزی آچیق قالمیشدیلار. هیچ من اؤزۆم ده او خانیم کیمی حالیم خوش دگیلدی. خانیملاردان بیریسی اونا ساری گلیب چیگینلرینی توتوب دئدی: – نه اولوب؟ نه اولوب عزیزیم؟! مدرسه ایشلهینی بیر لیوان سۇ گتیردی او خانیما. سو ایچمهسینه کؤمکلیک ائیلهدیلر. بیردن بیره آغلاماقدان ال چکیب دلی کیمی گۆلمگه باشلادی. سونرا تئز اؤزۆنه گلدی. اللری تیر تیر اسیردی. الینده لیوانین سویو دالغالی دنیزه اوْخشاییردی. مدیره اوْلوب بیتَنی ائیله دئدی سانکی اوْن یول تمرین ائیلهمیشدی.چوخ دویغولو دانیشیردی و مدیری ده کؤورلتدی. ناظم مدیره بیلدیردی خانیمین کلاسینا گئده. او دا گئتدی. مدیرین باش و بورنوندان بیلینیردی شماللی اوْلا. معلم خانیمین سؤزلرینی کسیب دئدیم: – خانیملار چوخ راحت آغلایا بیلرلر آنجاق مدیر بڲ سیز شماللی.لار نیه بو قدر اۆرگی اینجهسیز؟ معلم خانیم سؤزو یئکهلدیب، یوخسا من بیر ایش گؤرمهمیشم. بیر ایش ده گؤرمۆشمسه وظیفهم ایدی. معلم خانیم، منیم یولومو گئتمیشدی. ایلک مکتب اؤڲرتیملیک مدرکینی آلدیقدان سونرا اۆچ ایل ایدی درس وئریردی. مشه بؤیۆک بڲ کدخدانین قیزی الی ایله اؤلدۆردۆکدن سونرا آتاسی کدخد ایله تانیش اولدوغوندان کندی ترک ائتمهلی اوْلوب و شهرده درس اوْخوماغا گئتمیشدی. معلم خانیم یاخشی دا رسملر چکیردی. اوْ گۆنون صباحی کلاسدان چیخدیقدا معلم خانیملا بیرلیکده بیر جوان بڲ قارشیما گلدیلر. سلاملاشاندان سونرا بیلیندی خانیم معلمین أریدیر. أری الیمی برک توتموشدو و دئییردی گرکدیر ناهاری بیزده یئیهسیز. دوغروسو ایستهییردیم قیزین خوشبختلیگین یاخیندان گؤرم. خانیم معلمین ائوینه گئتدیک. جوان کیشی الیمی بوراخمیردی.
ایکینجی بؤلۆم نئچه دفعه ایستهدیم ألیمی ألیندن چکم آنجاق لاپ برک ألیمی سیخیب دئییردی: – چوخداندیر بو أللری گؤزلهییردیم. تکجه بیر دفعه یولدا اجازه آلدیم سیگار چکم و ألیمی بوراخدی. ائوه گیرر گیرمز ألیم کیشینین ألینده، دیواردان آسیلان رسمی گؤردوم. دئدی: – بو دا یتیشدیردیگین انسانین اثری. رسمده ایکی أل وار ایدی، بیری کیچیک و بیری بؤیۆک. ایکی أل آراسیندا بیر آووج پوسته بادام وار ایدی. أللرین دالیسی دا قدیم تاختا قاپی ایدی… رسمدهکی قاپینی گؤرر- گؤرمز تانیدیم و رسمین نه آنلام داشیدیغینی دا باشا تۆشدوم. گؤزلریم دوْلدو. معلم خانیم کوْتومون اتگیندن یاپیشیب دئدی: – منی باغیشلایین! منی باغیشلایین! سیزی کؤورلتدیم. دئدیم: – یوخ! ان خوش گۆنوم ائیله بو گۆندور، آنجاق معلم خانیم، بس کتاب یێرینه نیه بیر آووج آجیل چکیبسن؟ – آخی من آجیله گؤره اؤزۆمۆ قاپییا یاپیشدیراردیم! (رسمدهکی قاپینی گؤستردی.) أری ایستهییردی اورداکی دویغو یۆکلو هوانی دڲیشه، دئدی: – حبیبی بڲ! ائیله ایندی ده گئچمیشه تای قارینپادی! دئدیم: – بیر دلیدن سوْروشارلار آللّٰهین آدی نهدیر؟ دئدی “چؤرک!.” نیشابوردا قێتلیق (خشکسالی) اولدوغوندا قیرخ گئجه گۆندوز اذان سسی ائشیتمهدیم. ناهاری یئدیکدن سونرا معلم خانیم و أریندن ساغوللاشیب، ائولریندن چیخدیم.
نشانی ایمیل شما منتشر نخواهد شد. بخشهای موردنیاز علامتگذاری شدهاند *
دیدگاه *
نظرتان را بیان کنید
ذخیره نام، ایمیل و وبسایت من در مرورگر برای زمانی که دوباره دیدگاهی مینویسم.